მსოფლიო რაგბის ახალგაზრდული ჩემპიონატის ჯგუფური ეტაპის დასკვნით მატჩში საქართველოს ნაკრებმა ურუგვაი 56:3 დაამარცხა. ჩვენმა გუნდმა ტურნირზე პირველი გამარჯვება მოიპოვა. საქართველოს ნაკრები მეცხრე ადგილისთვის ნახევარფინალში იტალიას დაუპირისპირდება.
საქართველოს არ მიწვევამ ნატოს ყოველწლიურ სამიტზე, რომელიც ანკარაში იმართება, მთავრობის ოპონენტებსა და მმართველ პარტიას შორის დაპირისპირება გამოიწვია. ოპონენტები ქვეყნის დემოკრატიული უკუსვლისა და ნატოსთან ურთიერთობების გაყინვის შედეგად მიიჩნევენ ამ ფაქტს, მაშინ როცა „ქართული ოცნება“ კრიტიკას პროპაგანდად აფასებს და აცხადებს, რომ არაწევრ ქვეყნებს არც სხვა სამიტებზე იწვევენ.
გიორგი ბახუაშვილი, რომელიც ბიძინა ივანიშვილის პირადი დაცვის წევრი იყო, სახელმწიფო უსაფრთხოების სამსახურის უფროსის მოადგილედ დაინიშნა. შესაბამის ბრძანებას პრემიერ-მინისტრმა ირაკლი კობახიძემ 6 ივლისს მოაწერა ხელი. ბახუაშვილს სამართალდამცავ ორგანოებში სხვადასხვა თანამდებობა ეკავა, მათ შორის დაცვის პოლიციის დეპარტამენტში და სახელმწიფო დაცვის სპეციალურ სამსახურში.
აფხაზეთის საოკუპაციო რეჟიმმა „საერთაშორისო აღიარების“ მორიგი მცდელობა განახორციელა. ხელი მოეწერა შეთანხმებას „დაძმობილებული კავშირების“ დამყარების შესახებ ოკუპირებულ სოხუმსა და განის რესპუბლიკის სოჰუმის მუნიციპალური ოლქის ქალაქ სოჰუმს შორის. განის დელეგაცია აფხაზეთში საკუთარი ქვეყნის ეკონომიკური, საინვესტიციო და აგრარული პოტენციალის წარსადგენად ჩავიდა.
მსოფლიო ჩემპიონატის 1/8-ფინალში შვეიცარიამ პენალტების სერიაში კოლუმბია 4:3 დაამარცხა და 1954 წლის შემდეგ პირველად გავიდა მეოთხედფინალში. მატჩის ძირითადი და დამატებითი დრო 0:0 დასრულდა, პენალტების სერიაში კი შვეიცარიამ გაიმარჯვა. შვეიცარია 12 ივლისს, მეოთხედფინალში, კანზასში არგენტინას შეხვდება.
მსოფლიო ჩემპიონატის 1/8-ფინალში არგენტინამ ეგვიპტე 3:2 დაამარცხა. მატჩის შემდეგ ეგვიპტელთა ნაკრების ფეხბურთელმა მუსტაფა ზიკომ და მთავარმა მწვრთნელმა ჰოსან ჰასანმა შეხვედრის მთავარი არბიტრი გააკრიტიკეს და განაცხადეს, რომ ტურნირს მესის გასამარჯვებლად ატარებენ.
11 ივლისიდან ვარკეთილის დასახლებიდან ვაკის მიმართულებით მოძრავ N309 სამარშრუტო ხაზზე 18-მეტრიანი ავტობუსები შევლენ. ამ ცვლილებით, მგზავრთა გადაყვანის შესაძლებლობა გაორმაგდება და გაჩერებებზე ლოდინის დრო შემცირდება. ამის შესახებ დედაქალაქის მერმა, კახა კალაძემ განაცხადა.
აშშ-მ ირანული ნავთობის წარმოებაზე, მიწოდებასა და გაყიდვაზე სანქციები აღადგინა. ეს გადაწყვეტილება მას შემდეგ მიიღეს, რაც ირანმა ჰორმუზის სრუტეში კომერციულ გემებს დაესხა თავს. სანქციები 17 ივლისიდან შევა ძალაში, რამაც ნავთობის ფასი 5%-ზე მეტით გაზარდა.
გარემოს ეროვნული სააგენტოს ინფორმაციით, 6 ივლისის დღის ბოლოდან 9 ივლისის დღის პირველ ნახევრამდე აღმოსავლეთ საქართველოში ამინდი გაუარესდება. კახეთის რეგიონში მოსალოდნელია ძალიან ძლიერი წვიმა, ელჭექი, სეტყვა და ქარის გაძლიერება, რამაც შესაძლოა მეწყრულ-ღვარცოფული პროცესების გააქტიურება გამოიწვიოს.
რუსთაველის გამზირზე მიმდინარე უწყვეტი პროტესტის მონაწილეებმა ევროკავშირსა და მის წევრ სახელმწიფოებს ღია წერილით მიმართეს. ისინი აცხადებენ, რომ პროტესტი გაგრძელდება მანამ, სანამ არ გათავისუფლდებიან პოლიტპატიმრები, არ აღდგება ქვეყნის ევროპული კურსი და არ ჩატარდება თავისუფალი და სამართლიანი არჩევნები. წერილში ასევე აღნიშნულია, რომ საქართველო ევროპული ცივილიზაციის განუყოფელი ნაწილია და ევროინტეგრაცია ქვეყნის საყოველთაო არჩევანია.