ოპოზიციური პარტიები ხელისუფლებას ადანაშაულებენ, რომ რუსეთის დუმის მიერ ოკუპირებულ ცხინვალთან „მოკავშირეობის გაღრმავების” კანონის მიღებაზე სათანადოდ არ გამოეხმაურა. „ლელოს” ლიდერი სამადაშვილი ამ დუმილს „ქვეყნის ინტერესების საბოტაჟად” მიიჩნევს. „ქართული ოცნების” სპიკერი პაპუაშვილი კი ამბობს, რომ „საქართველოს შეზღუდული რესურსები აქვს ამ გადაწყვეტილებებზე ზემოქმედებისთვის.”
მოსამართლე თორნიკე კაპანაძემ Civil Georgia-ს ყოფილ ფოტოგრაფს ნინო საღირიძეს ტროტუარზე პროტესტის გამო ორდღიანი ადმინისტრაციული პატიმრობა შეუფარდა. სხვა ორ აქტივისტსაც — ელენე გელაშვილს და ნათია ჭელიძეს — ანალოგიური სასჯელი განესაზღვრათ.
საქართველოს პროკურატურამ „ქურდული სამყაროს” წევრობის, მისი მხარდაჭერისა და „კანონიერი ქურდისთვის” მიმართვის ბრალდებით 50 პირს ბრალდება წარუდგინა. ბრალდებულებმა მოქალაქეებს ფინანსური და კრიმინალური დავები „ქურდული გარჩევებით” გადაჭრეს, მსხვერპლებს ძალის გამოყენებით სესხები ააქტიურებინეს. სასჯელი 15 წლამდე თავისუფლების აღკვეთას ითვალისწინებს.
პარლამენტის სპიკერ შალვა პაპუაშვილმა „გახარია საქართველოსთვის” დეპუტატებს პარლამენტის ტრიბუნიდან ემოციური გამოსვლით მიმართა. პარტია „გახარია საქართველოსთვის” ადრე ვიდეოები გაავრცელა, სადაც ოცნების ზოგიერთი დეპუტატი ენმ-ის ხელისუფლებაში ყოფნისდროინდელ თანამდებობებზეა ნაჩვენები.
ჭიათურისა და საჩხერის მიტროპოლიტი დანიელი „პალიტრა ნიუსის” ეთერში ახალდადგენილ პატრიარქ შიო მესამეზე ისაუბრა. მისი თქმით, აღსაყდრებისას პატრიარქის თვალში ცრემლი მისიის გაცნობიერების, სიხარულისა და მადლიერების გამოხატვა იყო. მიტროპოლიტი ასევე ამბობს, რომ ეპისკოპოსები სრული ერთობის გარეშე ვერ „აწევენ ჯვარს, რასაც პატრიარქი ატარებდა.”
ოკუპირებულ აფხაზეთში მწვავე დისკუსია გაჩაღდა — რუსეთის მოქალაქეები, ყაბარდო-ბალყარეთიდან ჩამოსული პირები, თავს აფხაზური წარმომავლობის აბაზებად ასახელებენ და „აფხაზეთის პასპორტს” ითხოვენ. უარის მიღების შემდეგ მათ სოხუმის „სასამართლოებში” ათეულობით სარჩელი შეიტანეს.
Freedom House-მა განაცხადა, რომ 20 მაისს, ვაშინგტონში, საქართველოს ყოფილ პრეზიდენტს სალომე ზურაბიშვილს მარკ პალმერის პრიზი გადაეცემა. ჯილდო ეძლევა დიპლომატებსა და ოფიციალურ პირებს, რომლებიც დემოკრატიის განვითარებას ხელს უწყობენ.
კომპოზიტორი და დირიჟორი ნიკოლოზ რაჭველი სოციალურ ქსელში სოლიდარობას გამოხატავს — უკრაინის გამარჯვებასთან, საქართველოს ევროპულ ინტეგრაციასთან, სინდისის პატიმრების თავისუფლებასა და დიუშენის დისტროფიით დაავადებული ბავშვებისთვის მედიკამენტების მიწოდებასთან. ის ამავდროულად ლუცერნის, დრეზდენის, ბონის, ლვოვის, კიევისა და პარიზის კონცერტებისთვის მზადდება.
ევროპარლამენტმა სახელისუფლებო ტელეკომპანია „იმედის” აკრედიტაცია ერთი წლით შეუჩერა: არხის გადამღებმა ჯგუფმა ევროპარლამენტარი ლიეტუვიდან თანხმობის გარეშე გადაიღო. იმავე დღეს ცნობილი გახდა, რომ მოლდოვამ „იმედს”, „რუსთავი 2”-ს და POSTV-ს ევროპის საბჭოს შეხვედრის გასაშუქებლად აკრედიტაცია უარი უთხრა.
190-ზე მეტმა ექიმმა ხელისუფლებას ერთობლივი განცხადებით მიმართა და მოითხოვა, დიუშენის კუნთოვანი დისტროფიის მქონე პაციენტებთან ეფექტური კომუნიკაცია დამყარდეს, იშვიათ დაავადებათა მართვის პოლიტიკა შემუშავდეს და სიცოცხლისთვის აუცილებელ მედიკამენტებზე ხელმისაწვდომობა უზრუნველყოფილი იყოს.