ბათუმის იაშვილის კლინიკაში სავარაუდოდ 20 დღის ახალშობილი ხელიდან გაუვარდათ — ოჯახი ბრალს სდებს, კლინიკა უარყოფს. ბავშვი გულყრის გამო თბილისის იაშვილის ბავშვთა ცენტრალურ საავადმყოფოში 5 მაისს გადმოიყვანეს. კლინიკის დირექტორის ივანე ჩხაიძის განცხადებით, ჩვილის მდგომარეობა ახლა სტაბილურია და ის გაწერის ყველა კრიტერიუმს აკმაყოფილებს.
ანდრი ერმაკი, ზელენსკის ოფისის ყოფილი გამგე (2020–2025), 18 მაისს გაათავისუფლეს დროებითი მოთავსების იზოლატორიდან — 200-ზე მეტი გადარიცხვის შედეგად 154 მლნ გრივნა შეგროვდა. ანტიკორუფციული სასამართლო ერმაკს ბრალს სდებს 460 მლნ გრივნაზე მეტი ოდენობის თანხის გათეთრებაში.
ნარკოლოგი და პარტია ფედერალისტების წევრი ზურა სიხარულიძე სოციალურ ქსელში ნარკოტიკების ზედოზირებით გამოწვეულ გარდაცვალებათა ზრდაზე წერს და მოითხოვს ოფიციალურ სტატისტიკას. 22 წლის ახალგაზრდის გარდაცვალების ამბავი, სადაც იმავე ღამეს კიდევ 5 ადამიანი იგივე მიზეზით გარდაიცვალა, სიხარულიძეს საფრთხის კიდევ ერთ დამადასტურებელ მაგალითად მიაჩნია.
პარლამენტის წევრმა ვახტანგ თურნავამ ქონებრივი დეკლარაცია გამოაქვეყნა. 37 წლის დეპუტატს ეკუთვნის: 2025 წელს 1,4 მილიონ ევროდ შეძენილი ბინა იტალიაში, სამი ძვირადღირებული საათი, მათ შორის 47 312 ევროიანი Audemars Piguet, ასევე 200 000 დოლარის ღირებულების Bitcoin და ცეცხლსასროლი იარაღი.
14 მაისს რუსეთის „გიტისის” სტუდენტებმა რუსთაველის თეატრის სცენაზე წარმოდგინეს მეორე მსოფლიო ომის სიმღერები, მათ შორის „კატიუშა”. თეატრის დირექტორი ამბობს, რომ სცენა იჯარით გასცეს, ფული აიღეს და მომავალშიც გასცემენ. უფლებადამცველები, სამოქალაქო საზოგადოება და ექსპერტები კი ამ ფაქტს კრემლის ნარატივის პირდაპირი ინსტრუმენტალიზაციად აფასებენ.
ბელარუსის თავდაცვის სამინისტრომ 18 მაისს გამოაცხადა, რომ რუსეთთან „ურთიერთქმედებით” დაიწყო „ბირთვული იარაღის საბრძოლო გამოყენებისა და ბირთვული უზრუნველყოფის სამხედრო ნაწილების” წვრთნები. სწავლებები „გეგმური” და „მესამე ქვეყნების წინააღმდეგ არ მიმართული”ა — ამბობს სამინისტრო.
სურსათის ეროვნულმა სააგენტომ დაიწყო მოკვლევა მარნეულის მუნიციპალიტეტში სავარაუდო მოწამვლის ფაქტზე: 6 ადამიანი, მათ შორის ერთი ბავშვი, სავარაუდოდ საკონდიტრო ნაწარმის — ტორტის — მიღებით მოიწამლა. სააგენტო კოორდინაციაშია დაავადებათა კონტროლის ეროვნულ ცენტრთან.
რუსეთის სახელმწიფო სოციოლოგიური ცენტრი ВЦИОМ-მა გამოკითხვის მეთოდოლოგია შეცვალა. ახალი მონაცემებით, პუტინის მოწონება 7-კვირიანი კლების შემდეგ 66.8%-მდე გაიზარდა. ცენტრი ახლა ტელეფონთან ერთად კარდაკარ გამოკითხვასაც ახორციელებს.
იანიკ სინერმა რომის მასტერსის ფინალში კასპერ რუუდი ორ სეტში 6:4, 6:4 დაამარცხა. 29-ე კარიერული ტიტულის მოპოვებასთან ერთად სინერი გახდა მხოლოდ მეორე მოთამაშე ისტორიაში — ნოვაკ ჯოკოვიჩის შემდეგ — ვისაც ყველა ცხრა ATP Masters 1000 ტური მოუგია.
Amnesty International-ის ახალი ანგარიშით, 2025 წელს სასამართლოს განაჩენით 2 707 ადამიანი დასაჯეს სიკვდილით — 2024 წლის 1 518-სთან შედარებით თითქმის 80%-ით მეტი. სიკვდილით დასჯა მკვეთრად გაიზარდა ირანში, კონგოში, სუდანში, საუდის არაბეთსა და შეერთებულ შტატებში.