8 ივლისს, 20 საათზე, საქართველოს მოქმედი ჩემპიონი თბილისის “იბერია 1999” ჩემპიონთა ლიგის საკვალიფიკაციო ეტაპზე პირველ მატჩს გამართავს. დედაქალაქური კლუბის მეტოქე ესტონეთის მრავალგზის ჩემპიონი, ტალინის “ფლორა” იქნება.

ბოლო წლების ქრონიკული წარუმატებლობების მიუხედავად, ქართველი გულშემატკივარი მაინც იმედით ელის მორიგ ევროსეზონს, “იბერიას” კი დიდი მისია აქვს - მისი წარმატება სხვა ქართული კლუბებისთვის გვარიანი სტიმული იქნება.

“ლელო” ტალინში დაუკავშირდა და ექსკლუზიური ინტერვიუ ჩაწერა თბილისური კლუბის უკრაინელ მწვრთნელ ანდრეი დემჩენკოსთან. მას კარსმომდგარ მატჩში წარმატება ვუსურვეთ და რამდენიმე კითხვა დავუსვით…

• დიდი ხანი არ არის, რაც “იბერია” ჩაიბარეთ. როგორ წარიმართა ადაპტაციის პროცესი?

• ეს პროცესი უფრო სწრაფად წავიდა, ვიდრე ველოდი. ამ შემთხვევაში გადამწყვეტი, ალბათ, ის იყო, რომ კარგად ვიცი ქართული ფეხბურთი, შესანიშნავად ვიცნობ თქვენს ქვეყანას, ვიცი მენტალიტეტი და ასე შემდეგ.

• საინტერესოა თქვენი აზრი ტალინის “ფლორაზე”…

• ასე ვთქვათ, ჰაერში დაფრინავს აზრი, რომ ესტონური ბარიერი უკვე გავლილია. ისე ჩანს, რომ ზოგიერთი სპეციალისტიც კი ასე ფიქრობს. არამც და არამც არ შეიძლება საკითხისადმი ასე მიდგომა. ყველაფერს რომ თავი დავანებოთ, ეს ჩემპიონთა ლიგაა და თუნდაც საკვალიფიკაციო ეტაპზე აქ სუსტი გუნდები არ არიან. სუსტი გუნდი ვერაფრით გახდება საკუთარი ქვეყნის ჩემპიონი. ასე რომ, ჩვენი მომავალი მეტოქე ბოლომდე უნდა დავაფასოთ. მჯერა, ჩვენს ფეხბურთელებსს ეს ბოლომდე აქვთ გათავისებული.

• ამ დროისთვის თქვენს განკარგულებაში მყოფი ყველა ფეხბურთელი ჯანმრთელად არის?

• კი, ჯანმრთელად არიან. თამაშამდე კიდევ ერთი დღეა დარჩენილი და დიდი იმედი მაქვს, მატჩის დაწყების დროსაც ასე იქნება. აქ 21 ფეხბურთელით ჩამოვედით და ყველა სრულ საბრძოლო მზადყოფნაშია.

• “იბერიამ” ჩემპიონთა ლიგის დაწყებამდე რამდენიმე ახალი ფეხბურთელი დაიმატა. როგორ მიდის მათი ინტეგრაცია გუნდში და იმის გათვალისწინებით, რომ ახალწვეულები არიან, შეძლებენ, რომ “ფლორასთან” შეხვედრაშივე გუნდს სარგებელი მოუტანონ?

• ჩვენ გვყავს ოთხი ახალი ფეხბურთელი - მცველი სანტოსი, ნახევარმცველები - კულიევი და იბრაჰიმი, ასევე თავდამსხმელი ჩიხრაძე. ადაპტაციის პროცესი ინდივიდუალურია, მაგრამ ჩვენ გვჯერა ამ ფეხბურთელების. მჯერა, რომ თუნდაც უკვე “ფლორასთან” შეხვედრაში სარგებლობას მოუტანენ გუნდს.

• უფრო კონკრეტულად რომ შეაფასოთ მომავალი მეტოქე…

• “ფლორას” ხელმძღვანელობას აქვს კონკრეტული გეზი - აქცენტს ადგილობრივ ფეხბურთელებზე აკეთებს, ლეგიონერი საერთოდ არ ჰყავთ. ეს გუნდი საინტერესოა ტაქტიკური თვალსაზრისით, ყოველთვის ცდილობს, გამართულად ითამაშოს. ორიენტირებულია ბურთის დაჭერაზე. უნდა აღინიშნოს ისიც, რომ “ფლორა” ახალგაზრდა და გამოცდილი ფეხბურთელების ნაზავია. აქ არიან ახალგაზრდა, საინტერესო ფეხბურთელები და ისეთი მოთამაშეები, რომელთაც არაერთი შეხვედრა ჩაუტარებიათ ესტონეთის ეროვნული ნაკრების შემადგენლობაში.

• თქვენი აზრით, რა შეიძლება იყოს გადამწყვეტი ფაქტორი ამ ორმატჩიან დუელში?
• ეს უნდა იყოს ქართველი ფეხბურთელების უდიდესი, განსაკუთრებული მოტივაცია. ჩვენ უნდა ვითამაშოთ ჩვენი ფეხბურთი. საფეხბურთო ჭეშმარიტებაა - მეტოქე თამაშობს ისე, რის საშუალებასაც შენ აძლევ. ჩემი ხელმძღვანელობით “იბერიას” მიერ ჩატარებულ მატჩებს თუ გადავხედავთ, შეიმჩნევა დადებითი დინამიკა. კიდევ ერთხელ ვიმეორებ - ჩვენი ფეხბურთი უნდა ვითამაშოთ.