საქართველოს სლავა მეტრეველის სახელობის სუპერთასის გამარჯვებული ქუთაისის „ტორპედო“ გახდა, რომელმაც ფინალურ მატჩში თბილისის „იბერია 1999“ დაამარცხა. მესამე ადგილისთვის გამართულ შეხვედრაში კი თბილისის „დინამომ“ „დილა“ დაჯაბნა. მატჩების ხარისხი და მაყურებელთა დასწრება კვლავ დაბალი იყო, რაც გულშემატკივრებში შეშფოთებას იწვევს ევროთასებზე წარმატების მიღწევის კუთხით.
საქართველოს პარლამენტმა ოპოზიციურად განწყობილი ტელეკომპანია „პირველის“ სამ ჟურნალისტს, ნატალია ქაჯაიას, მაკა ჩიხლაძესა და მაკა ანდრონიკაშვილს, აკრედიტაცია დროებით შეუჩერა. ჟურნალისტებს აკრედიტაცია სხვადასხვა ვადით, ერთი თვიდან ერთ წლამდე, შეუჩერდათ, რისი მიზეზიც, პარლამენტის აპარატის ხელმძღვანელის თქმით, ჟურნალისტების მიერ ინტერვიუების ჩაწერის წესების დარღვევა გახდა. ჟურნალისტური ეთიკის ქარტიამ და მედია საშუალებებმა ეს გადაწყვეტილება გააკრიტიკეს და მას ჟურნალისტების დევნად შეაფასეს.
სასამართლომ „ქინდერლი ჯორჯიას“ ორი დამფუძნებელი, სომხეთისა და უკრაინის მოქალაქეები, სუროგატი დედებისა და ბიოლოგიური მშობლების კუთვნილი თანხების მითვისებაში დამნაშავედ ცნო და მათ ათ-ათი წლით თავისუფლების აღკვეთა მიუსაჯა. პროკურატურის ინფორმაციით, ბრალდებულებმა ჩინეთის მოქალაქეებისგან მოზიდული 2 მილიონ ლარზე მეტი თანხა მიითვისეს, რომელიც სუროგატი დედების ხარჯებსა და ანაზღაურებას უნდა მოხმარებოდა. ქალთა უფლებადამცველი ორგანიზაციები მიიჩნევენ, რომ საქმე ადამიანებით ვაჭრობის კვალიფიკაციით უნდა დაწყებულიყო.
გერმანიის ელჩმა საქართველოში პიტერ ფიშერმა, რომელიც ამ პოსტზე 2022 წლიდან მსახურობდა, 30 ივნისს მისიის დასრულების შესახებ გააკეთა განცხადება. ფიშერი თბილისის ანტიდასავლური და ანტიდემოკრატიული კურსის ერთ-ერთი ყველაზე მკაფიო ოპონენტი იყო და არაერთხელ გამხდარა „ქართული ოცნებისა“ და სახელისუფლებო მედიის კრიტიკის სამიზნე. პრემიერ-მინისტრმა ირაკლი კობახიძემ კვლავ დაადანაშაულა ფიშერი საქართველო-გერმანიის ურთიერთობებისთვის „დიდი ზიანის“ მიყენებაში.
ბათუმში არასრულწლოვნების ტრეფიკინგის ბრალდებით სამი პირი დააკავეს. დაკავებულებს შორის არიან საქართველოს და უცხო ქვეყნის მოქალაქეები, რომლებმაც მატერიალური სარგებლის მიღების მიზნით, საკუთარი შვილები ჩართეს ტრეფიკინგის სქემაში. ბრალდებულები არასრულწლოვლებს ფსიქოლოგიური ძალადობის გამოყენებით აიძულებდნენ მოწყალების თხოვნასა და ყვავილებით ვაჭრობას, რის შედეგადაც შეგროვებულ თანხას ისაკუთრებდნენ.
თბილისში, 4 ივლისიდან N339 და N385 საზოგადოებრივი ტრანსპორტის მარშრუტებზე 12-მეტრიანი ავტობუსები 18-მეტრიანი ავტობუსებით შეიცვლება. ამ ცვლილების შედეგად, აღნიშნულ მარშრუტებზე მგზავრობის მოცულობა გაორმაგდება. თბილისის მერიის ინფორმაციით, ეს ნაბიჯი საზოგადოებრივი ტრანსპორტის სერვისის გაუმჯობესებას და მგზავრებისთვის უფრო კომფორტულ გადაადგილებას ემსახურება.
უფლებადამცველმა ბაია პატარაიამ გაავრცელა ინფორმაცია თბილისში მოკლული აზერბაიჯანელი გოგონას, 2005 წელს დაბადებული ფატიმა კერიმოვას შესახებ. გოგონა საქართველოში შეყვარებულმა ჩამოიყვანა, თუმცა ურთიერთობა მალევე დაიძაბა, რის შემდეგაც ის მოკლული იპოვეს. მკვლელი, სავარაუდოდ, თურქეთში გაქცეულა.
ქართული ფრანჩაიზი „შავი ლომი“ ჩელენჯ კაპის გათამაშებაში კვლავ მიიწვიეს და მომდევნო სეზონში C ჯგუფში ითამაშებს. ჯგუფში მისი მეტოქეები იქნებიან უელსური „ოსფრიზი“, შოტლანდიის „ედინბურგი“, ინგლისური „ჰარლიქვინზი“ და ფრანგული კლუბები „ტულონი“ და „ვანი“. აღსანიშნავია, რომ წლევანდელ გათამაშებაში საპრემიო ქულის დარიცხვის წესი და ჯგუფიდან პლეი ოფში გასვლის სისტემა შეიცვალა.
საქართველოს სტატისტიკის ეროვნული სამსახურის (საქსტატი) მონაცემებით, 2026 წლის მაისში ქვეყნის რეალური მთლიანი შიდა პროდუქტი (მშპ) 6.4%-ით გაიზარდა წინა წლის ანალოგიურ პერიოდთან შედარებით. 2026 წლის პირველი ხუთი თვის საშუალო მაჩვენებელი კი 7.8%-ს შეადგენს. ზრდა ძირითადად საფინანსო, სადაზღვევო, ინფორმაციისა და კომუნიკაციის, დამამუშავებელი მრეწველობის, ტრანსპორტისა და დასაწყობების სექტორებმა განაპირობა, თუმცა მშენებლობის სექტორში კლება დაფიქსირდა.
საბა ლობჟანიძემ კლუბი შეიცვალა MLS-ში. „ატლანტა იუნაიტედმა“ მასში 725 000 დოლარი მიიღო „რეალ სოლტ ლეიკისგან“. ამ თანხის ნაწილი გარანტირებულია, ხოლო ნაწილი დამოკიდებულია ლობჟანიძის კონტრაქტის განახლებაზე. ქართველმა ფეხბურთელმა „ატლანტაში“ 93 მატჩში 15 გოლი და 21 საგოლე გადაცემა მიითვალა.