მოსკოვის გამარჯვების დღის 81-ე წლისთავის აღლუმს 15-მდე ქვეყნის ლიდერი დაესწრება — 2025 წელთან შედარებით ნახევარზე ნაკლები. სიაში, სხვათა შორის, სახელდება საქართველოს ოკუპირებული ტერიტორიების, აფხაზეთისა და სამხრეთ ოსეთის ე.წ. ლიდერები გუნბა და გაგლოევი. ამ წელს მძიმე ჯავშანტექნიკა პირველად ვერ გამოჩნდება.
კოალიცია „ცვლილებისთვის”-ის წევრმა გელა ხასიამ ბრალი აღიარა და პროკურატურასთან საპროცესო შეთანხმება გააფორმა. ხასია 1 წელს ციხეში გაატარებს და სექტემბერში გათავისუფლდება, შემდეგ კი 3 წელი პირობითი მსჯავრის ქვეშ იქნება.”
საკრუიზო გემ MV Hondius-ზე ჰანტავირუსის შტამი „ანდესი” გამოვლინდა — 3 ადამიანი გარდაიცვალა, მათ შორის ბრიტანეთის მოქალაქეები. ბრიტანეთმა ევაკუაციის გეგმა შეიმუშავა; ყველა მგზავრი ქვეყანაში დაბრუნების შემდეგ 45 დღე იზოლაციაში გაატარებს. ეს ჰანტავირუსის შტამი ადამიანებს შორის გადადების უნარის გამო განსაკუთრებულ საფრთხედ ითვლება.”
11 მაისს სამების ტაძარში გაფართოებული საეკლესიო კრება გაიმართება, სადაც ილია II-ის მემკვიდრე აირჩევა. სამ კანდიდატს შორის მოსაყდრე მიტროპოლიტმა შიომ 28 აპრილის სინოდის სხდომაზე ყველაზე მეტი ხმა — 20 — მიიღო. პატრიარქობის კანდიდატს ხმების 50%-ზე მეტი სჭირდება.
თბილისის სასამართლომ 2025 წლის 4 ოქტომბრის საარჩევნო დღის არეულობის 10 ბრალდებულს განაჩენი გამოუტანა. ორგანიზატორებს — მათ შორის ბურჭულაძეს, ზოდელავასა და ნადირაძეს — 7-წლიანი პატიმრობა მიეცათ; მონაწილეებს — 5 წელი. ბრალდება მოიცავდა კონსტიტუციური წყობილების ძალადობრივი შეცვლისკენ მოწოდებას.
პირველად 2024-2025 წლების საპროტესტო ძალადობაში ამჟამინდელი პოლიციელები ბრალდებულად ყავთ. 5 სპეცრაზმელი/პოლიციელი ზვიად მაისაშვილის, ლევან ხაბეიშვილის და ჟურნალისტ გურამ როგავასთვის ძალადობისთვის დაკავდა; სასამართლომ სამს პატიმრობა შეუფარდა. სასჯელი 5-8 წლამდე პატიმრობაა.
„ქართული ოცნების” საგარეო საქმეთა მინისტრი მაკა ბოჭორიშვილი და მისი უკრაინელი კოლეგა ანდრი სიბიჰა ტელეფონით ისაუბრეს. კიევის ინიციატივით გამართულ საუბარში ყურადღება დიალოგის მნიშვნელობაზე გამახვილდა. სიბიჰამ განაცხადა, რომ მხარეები ორმხრივი ნორმალიზაციის ინტერესზე შეთანხმდნენ.”
თბილისის საქალაქო სასამართლომ ბიზნესმენ ძმები დავით და გიორგი მიქაძეები, ასევე გიორგი ჯოხაძე, ბიზნესმენ ლევან ჯანგველაძის შეკვეთილი მკვლელობის ორგანიზებაში დამნაშავედ ცნო და სამუდამო თავისუფლების აღკვეთა მიუსაჯა. ძმები საქართველოში არ იმყოფებიან — განაჩენი დაუსწრებლად გამოიტანეს.
12 ივნისს თბილისში ამერიკელი რეპერ კანიე უესტის (YE) კონცერტი გაიმართება — ეს ანონსი კულტურის სამინისტროსთან დაკავშირებულმა Starring Georgia-მ გააკეთა. კონცერტი თბილისში ანტისემიტური განცხადებების გამო ევროპაში რამდენიმე ღონისძიების გაუქმების ფონზე ტარდება.
საქართველოს ეროვნული ბანკის მონეტარული პოლიტიკის კომიტეტმა 6 მაისს მონეტარული პოლიტიკის განაკვეთი 0.25 პუნქტით გაზარდა — 8.0%-დან 8.25%-მდე. მთავარ მიზეზად ახლო აღმოსავლეთში გამწვავებული ვითარება და ჰორმუზის სრუტეს ტრანსპორტირების შეფერხებები დასახელდა. 2024 წლის მაისიდან განაკვეთი პირველად გაიზარდა.