ბათუმში დაწყებულ საქართველოს ახალგაზრდულ ოლიმპიურ ფესტივალზე ძიუდოს პირველ ჩემპიონად თბილისის გუნდი იქცა. კულმინაციური ფინალი ქვემო ქართლთან 0:2-დან 4:2-ის მოგებით დასრულდა. ბრინჯაოს მედლები შიდა ქართლმა და იმერეთმა მოიპოვეს.
დიუშენის სინდრომის მქონე ბავშვების მშობლებმა 3 ივნისს მთავრობის კანცელარიაში ირაკლი კობახიძეს შეხვდნენ — 45-ღამიანი ღამისთევის შემდეგ. მოლაპარაკებების შედეგად შეთანხმდნენ სამუშაო ჯგუფის შექმნაზე; მომდევნო შეხვედრა 6 ივნისს გაიმართება. მშობლებმა შეხვედრა „იმედისმომცემად” შეაფასეს, ოღონდ კონკრეტული პასუხი ჯერ არ მიუღიათ.
8-14 ივნისს მოლდოვა ჩოგბურთელ ვაჟთა მსოფლიოს გუნდური ჩემპიონატს — დევისის თასს — უმასპინძლებს. საქართველოს ნაკრები ევროპის ზონის III ჯგუფში შვიდ სხვა ქვეყანასთან ერთად ასპარეზობს; გუნდს ხელმძღვანელობს კაპიტანი დავით კვერნაძე.
პორტუგალიელი ჟურნალისტის ცნობით, „ბენფიკამ” „სენტ ეტიენთან” ქართველი შემტევი ზურიკო დავითაშვილის ტრანსფერზე მოლაპარაკებები დაიწყო. ტრანსფერის ფასი 12-15 მლნ ევრო იქნება. ლისაბონელთა ახალ მწვრთნელად 48 წლის მარკო სილვა ინიშნება, რომელიც გუშინ „ფულჰემი” დატოვა.
საქართველოს ნაკრების ფეხბურთელი გიორგი ჩაკვეტაძე 5 ივნისს ბაჰრეინთან ამხანაგური მატჩის გამოტოვებს. Geo Team-ის ცნობით, 2 ივნისს რუმინეთთან (1:1) ამხანაგურ შეხვედრაში მეტოქე გუნდის მცველთან შეჯახებისას მიღებული ტრავმა სერიოზული არ აღმოჩნდა — „ჩაკვეს” 3-4 დღე სჭირდება.
1 ივნისს ბათუმის ცენტრალური ბაზრის მიმდებარედ 43 წლის როლანდ (როლიკა) დავითაძეს ყოფილი მეგობარი და მეზობელი ეგზომ შარაშიძე 8-ჯერ ესროლა — შვილისა და ცოლის თვალწინ. ერთი ტყვია გულზე ჯვარს მოხვდა; კლინიკაში მიყვანამდე გარდაიცვალა. სიკვდილამდე მოუსწრო და ცოლს მკვლელის ვინაობა გაანდო. პოლიციამ დამნაშავის სახლში მრავალი სახეობის იარაღი ამოიღო; ეჭვმიტანილი დაკავებული არ არის.
საქართველოში მყოფი აშშ-ის საელჩო ეხმაურება 3 ქართველი მოქალაქის დაკავებას ამერიკაში უკანონო შესვლასა და დოკუმენტების გაყალბებაში. საელჩო ამ ნაბიჯს ქვეყნებს შორის „რამდენიმეთვიანი მჭიდრო თანამშრომლობის შედეგად” მოიხსენიებს.
4 ოქტომბრის „სასახლის ღამის” საქმეზე დაკავებულ 6 პირს პროკურატურა საპროცესო შეთანხმებას გაუფორმებს. ბრალდებულის ადვოკატის ინფორმაციით, შეთანხმება 3-წლიანი პირობით სასჯელს ითვალისწინებს, შესაბამისი განცხადება გენერალურ პროკურორს უკვე გადაეგზავნა.
პრემიერ-მინისტრმა ირაკლი კობახიძემ გერმანიის ხელისუფლების ქმედებები „არასერიოზულად” შეაფასა — მათ შორის, გერმანიაში საქართველოს ელჩის რწმუნებათა სიგელის მიუღებლობა. კობახიძემ თქვა, რომ გერმანიამ ისტორიულად პრინციპებზე დაფუძნებულ სახელმწიფოს რეპუტაცია დაკარგა.
2 ივნისს ბათუმის სტადიონზე საზეიმოდ გაიხსნა საქართველოს პირველი ახალგაზრდული ოლიმპიური ფესტივალი — ქვეყნის ისტორიაში პირველი მულტისპორტული ღონისძიება ახალგაზრდებისთვის. სრულად სავსე სტადიონი 12 რეგიონის კულტურას, ეთნოქორეოგრაფიას და გუნდების აღლუმს შეესწრო.