მთავრობის ახალი დადგენილებით, თუ ოჯახის ერთ წევრზე სამ თვეში ხელფასი 1 250 ლარს ან მეტს შეადგენს, ოჯახი სოციალურად დაუცველის სტატუსს კარგავს ავტომატურად. ცვლილება ეკონომიკური „წინსვლის” ფონზე ბაზის გადამოწმების ნაწილია.
ჩეხეთში, კარლოვ ვარში, ნარკოტიკული ნივთიერებების შენახვის ბრალდებით დააკავეს რუსეთის მართლმადიდებლური ეკლესიის მიტროპოლიტი ილარიონი (ალფეევი), რომელიც საქართველოში ილია II-ის დაკრძალვაზე რუსეთის დელეგაციის შემადგენლობაში ჩავიდა. ილარიონი ინციდენტს პროვოკაციად მიიჩნევს.
Setanta Sports-მა საქართველოში FIFA-ს 2026 წლის მსოფლიო ჩემპიონატის მაუწყებლობის ექსკლუზიური უფლებები მოიპოვა. ტურნირის ყველა მატჩი სატელევიზიო არხებზე და OTT პლატფორმა setantasports.com-ზე უფასოდ გაიმართება 11 ივნისიდან 19 ივლისის ჩათვლით.
ილიაუნის სტუდენტების 100-საათიანი LIVE მარათონი 1 670 938 ლარის შეგროვებით დასრულდა — თანხა, რომელიც მარათონის ორგანიზატორებისთვის „წარმოუდგენელი” იყო. მთელი თანხა დიუშენის კუნთოვანი დისტროფიით დაავადებული ბავშვების ოჯახებს გადაეცემა.
სახელმწიფო უსაფრთხოების სამსახურის ანტიკორუფციული სააგენტოს თანამშრომელი ხაშურში, საკუთარ ავტომანქანაში, ცეცხლსასროლი იარაღით მიყენებული ჭრილობით გარდაცვლილი იპოვეს. პროკურატურამ გამოძიება „თვითმკვლელობამდე მიყვანის” მუხლით დაიწყო. სუს-მა გარდაცვლილი „გამორჩეულ, ღირსეულ და პროფესიონალ თანამშრომლად” დაახასიათა.
აშშ-ის პრეზიდენტმა დონალდ ტრამპმა Truth Social-ში განაცხადა, რომ ირანის პორტებს ბლოკადა საბოლოო შეთანხმების ხელმოწერამდე სრულ ძალაში დარჩება. ამავდროულად მოლაპარაკებები, მისი თქმით, „მწყობრად და კონსტრუქციულად” მიდის, ხოლო Axios-ის ცნობით, 60-დღიანი ზავის მემორანდუმის პროექტი ფაქტობრივად შეთანხმებულია.
ჯანდაცვის მინისტრის ბრძანებით, 1 ივნისიდან ყოველთვიურად შეჩერდება საყოველთაო ჯანმრთელობის დაცვის პროგრამაში იმ მოქალაქეთა რეგისტრაცია, ვინც ქვეყნის ფარგლებს გარეთ უწყვეტად 6 თვეზე მეტ ხანს იმყოფება. პროგრამაში ხელახალი ჩართვისთვის სპეციალური პირობების შესრულება დასჭირდებათ.
The Telegraph-ის ინფორმაციით, ნატოს გენერალური მდივნის მარკ რიუტეს წინადადება — ალიანსის წევრებმა მთლიანი შიდა პროდუქტის 0,25% უკრაინის სამხედრო დახმარებაზე მიმართონ — ხუთი ძირითადი წევრის წინააღმდეგობის გამო ჩაიკლა. რიუტემ დაადასტურა, რომ გეგმა ანკარის სამიტზე წარდგენილი არ იქნება.
შინაგან საქმეთა სამინისტროს აჭარის სამმართველოს თანამშრომლებმა ბათუმში უკრაინისა და თურქეთის მოქალაქეები განსაკუთრებით დიდი ოდენობით მეთადონის შეძენა-შენახვისა და გასაღების ხელშეწყობის ბრალდებით დააკავეს.
მარნეული-სადახლო-ახკერპის საავტომობილო გზაზე ორი მსუბუქი ავტომობილის შეჯახებას ერთი ადამიანის სიცოცხლე ემსხვერპლა, ოთხი კი სხვადასხვა სახის დაზიანებებით გადაიყვანეს. გამოძიება დაწყებულია.