„გუშინ საქართველო დემოკრატიის შუქურა იყო, ის იყო რეფორმებისა და გარდაქმნების მაგალითი რეგიონში. ძალიან სწრაფად მოხდა დემოკრატიის, სახელმწიფოს მიტაცება” — ამ სიტყვებით დაიწყო სალომე ზურაბიშვილის სიტყვა ოსლოში, საერთაშორისო ფორუმზე.

ყოფილი პრეზიდენტი ამბობს, რომ ქვეყანა „იმ წერტილამდე მივიდა, სადაც საზოგადოება არჩევანის წინაშეა — ან საკუთარი თავი გადაარჩინოს, ან დიქტატურას დაემორჩილოს.”

მტკიცებულებები, რომლებსაც ახსენებს

ზურაბიშვილი კონკრეტულ მაგალითებს ასახელებს:

• განაჩენების 100% პროკურატურის მოთხოვნას ემთხვევა
• „რეპრესიული კანონები თითქმის ყოველ მეორე დღეს მიიღება” — მედიისა და სამოქალაქო საზოგადოების წინააღმდეგ
• მშვიდობიანი პროტესტის კრიმინალიზაცია: „შეიძლება დაგაჯარიმონ ან დაგაკავონ მხოლოდ იმიტომ, რომ ტროტუარზე დგახარ”
• „ერთ პარტიასა და ერთ ადამიანში” კონცენტრირებული ხელისუფლება

„ეს კლასიკური რუსული სახელმძღვანელოა” — განაცხადა ზურაბიშვილმა.

ამ ადამიანმა, ვისაც ძალაუფლება უჭირავს, „ახლახანს საკუთარი კერძო საკუთრების გარშემო 50-კილომეტრიანი საჰაერო აკრძალვის ზონა გამოაცხადა” — ეს, ზურაბიშვილის სიტყვებით, „ბევრ რამეზე მეტყველებს.”

ოპოზიციური პარტიების გაუქმებაც შესაძლებელია

ზურაბიშვილი ახსენებს, რომ საკონსტიტუციო სასამართლოში ორი საქმე განიხილება ოპოზიციური პარტიების საქმიანობის შეზღუდვასთან დაკავშირებით — „შესაძლოა, მალე პარტიები დე იურე აიკრძალოს.”