ჩრდილოეთ ოსეთის მებაჟეებმა ზემო ლარსის სასაზღვრო-გამშვებ პუნქტზე 40 წლის რუსი მოქალაქე დააკავეს — ის საქართველოდან 47 ნაწილისგან შემდგარ ანტიკვარულ ცივ იარაღს რუსეთში გადაჰქონდა საბაჟო გამოცხადების გარეშე. ეს გახდა ცნობილი რუსეთის ფედერალური საბაჟო სამსახურის განცხადებიდან.

ინსპექტორებმა ავტომობილის სალონში, ჩანთებსა და პირად ნივთებს შორის, XIX-XX საუკუნეების ხმლები, ხანჯლები, საბაიონეტე შუბები, დაშნები და რიტუალური დანები აღმოაჩინეს. ნივთები ჩრდილოეთ კავკასიაში, ამიერკავკასიაში, ევროპაში, ჩრდილოეთ აფრიკაში, ინდოეთსა და იაპონიაშია დამზადებული. კოლექციის მთლიანი ღირებულება 2 მლნ. რუბლად შეფასდა.

მძღოლმა განმარტა, რომ ანტიკვარიატი პირადი კოლექციისთვის შეიძინა, მაგრამ გადასატანად საჭირო ნებართვები ვერ წარმოადგინა. ექსპერტიზამ დაადასტურა, რომ ამოღებული ნივთები კულტურულ ფასეულობებს წარმოადგენს. სისხლის სამართლის საქმე კულტურული ფასეულობების უკანონო გადატანის მუხლით აღიძრა, რაც 5 წლამდე პატიმრობას ან 1 მლნ. რუბლის ჯარიმას ითვალისწინებს.