უკრაინის ანტიკორუფციულმა უმაღლესმა სასამართლომ (HACC) 14 მაისს პრეზიდენტ ზელენსკის ოფისის ყოფილ ხელმძღვანელს, ანდრეი ერმაკს, 60-დღიანი პატიმრობა შეუფარდა. სასამართლომ ეჭვმიტანილს უფლება მისცა, აღკვეთის ღონისძიება 140 მილიონი გრივნის — დაახლოებით 3,2 მილიონი დოლარის — გირაოს გადახდით შეცვალოს.

ანტიკორუფციული ბიუროს (NABU) შუამდგომლობა ნაწილობრივ დაკმაყოფილდა — პროკურატურა 180-მილიონიანი გირაოს სანაცვლო გათავისუფლებას ითხოვდა. გირაოს შემთხვევაში ერმაკს მკაცრი შეზღუდვები დაეკისრება: კიევის ტოვება ეკრძალება, პასპორტები უნდა ჩააბაროს, საქმის სხვა ეჭვმიტანილებთან — ჩერნიშოვთან, მინდიჩთან, ლისენკოსთან — კომუნიკაცია აეკრძალება, ელექტრონული სამაჯური მუდმივად უნდა ატაროს.

სასამართლო პროცესზე ერმაკმა განაცხადა, რომ გირაოს გადახდისთვის საკუთარი სახსრები არ გააჩნია და „მეგობრების” დახმარების იმედი აქვს. მისმა ადვოკატებმა გადაწყვეტილების გასაჩივრება დააანონსეს. განჩინების სრული ტექსტი 18 მაისს გამოქვეყნდება.

გამოძიება ერმაკს კიევის ოლქის ელიტარული კოტეჯების კომპლექსის — Dynasty-ს მშენებლობაში 460 მილიონი გრივნის გათეთრებას ედავება. NABU-სა და SAP-ის ვერსიით, ეს თანხები „ენერგოატომის” კორუფციული სქემებიდან იყო მოპოვებული.