11 ივნისს ევროკომისიასა და საქართველოს დელეგაციის წარმომადგენლებს შორის გამართული შეხვედრა ტექნიკური და პროცედურული ხასიათისაა — ამის შესახებ ევროკომისიის პრესსპიკერმა მარკუს ლამერტმა Euroscope-ის კითხვის საპასუხოდ განაცხადა.

ლამერტის განმარტებით, შეხვედრა სავიზო რეგულაციით გაწერილი სტანდარტული პროცედურის ნაწილია, რომელიც ავტომატურად იწყება სავიზო შეჩერების მექანიზმის ამოქმედებისთანავე. ეს გამომდინარეობს მიმდინარე წლის მარტში მიღებული სამართლებრივი გადაწყვეტილებიდან, რომლითაც დიპლომატიური და სამსახურებრივი პასპორტების მფლობელ საქართველოს მოქალაქეებს უვიზო მიმოსვლა 12 თვის ვადით შეუჩერდათ.

„შეხვედრის მიზანია, გამოსწორდეს ის გარემოებები, რომლებმაც ამ შეჩერებამდე მიგვიყვანა — კერძოდ, საქართველოს მხრიდან დემოკრატიისა და ფუნდამენტური უფლებების სფეროში აღებული საკვანძო ვალდებულებების დარღვევა”, — განაცხადა ლამერტმა.

„რადიო თავისუფლების” ევროპის ბიუროს ხელმძღვანელი რიკარდ იოზვიაკი ამ შეხვედრას „მნიშვნელოვანს” უწოდებდა უვიზო რეჟიმის საბოლოო შეჩერებასთან დაკავშირებით. საქართველოს დიპლომატიური, სამსახურებრივი და ოფიციალური პასპორტების მფლობელებისთვის უვიზო მიმოსვლა ევროკომისიამ 6 მარტს შეაჩერა.