აშშ-ის სახელმწიფო დეპარტამენტის წარმომადგენლები 24-29 მაისს თბილისს სტუმრობენ, სადაც „ქართული ოცნების“ ხელისუფლების, პოლიტიკური პარტიების, ბიზნეს საზოგადოების წარმომადგენლებსა და რელიგიურ ლიდერებს შეხვდებიან, განუცხადა აშშ-ის საელჩომ „სამოქალაქო საქართველოს“ 25 მაისს. დელეგაციის წევრები არიან: ჩარლზ იოქი, თანაშემწე საგანგებო საკითხებში, და პიტერ ანდრეოლი, რუსეთისა და კავკასიის საკითხთა ოფისის დირექტორი, რომელიც მარტში უკვე სტუმრობდა საქართველოს.„შეხვედრებზე ყურადღება გამახვილდება იმ საკითხებზე, რომლებიც ჩვენი ორი ქვეყნის ორმხრივი ურთიერთობების გასაუმჯობესებლად, ასევე ქართველი და ამერიკელი ხალხის კეთილდღეობის ზრდის გზაზე დასაყენებლადაა საჭირო“, – განაცხადა საელჩომ.მაშინ როცა სახელმწიფო დეპარტამენტის წარმომადგენლები თბილისში იმყოფებიან, აშშ-ის სახელმწიფო მდივანი მარკო რუბიო 26 მაისს სომხეთს ეწვევა, თუმცა საქართველოში ვიზიტი დაგეგმილი არ აქვს.შეხვედრა “ქართული ოცნების” ოფიციალურ პირებთან 25 მაისს, აშშ-ის ოფიციალური პირები „ქართული ოცნების“ პრემიერ-მინისტრ ირაკლი კობახიძეს შეხვდნენ.„შეხვედრაზე ყურადღება გამახვილდა საქართველოსა და აშშ-ის ურთიერთობების გადატვირთვისა და კონკრეტულ გზამკვლევზე დაფუძნებული სტრატეგიული პარტნიორობის მნიშვნელობაზე“, – ნათქვამია საქართველოს მთავრობის ადმინისტრაციის პრესრელიზში, რომლის თანახმადაც კობახიძემ „კიდევ ერთხელ დაადასტურა საქართველოს მთავრობის მზადყოფნა ურთიერთპატივისცემაზე დაფუძნებული ორმხრივი ურთიერთობების სუფთა ფურცლიდან განახლებისთვის“.„ხაზი გაესვა საქართველოს, როგორც სანდო და საიმედო პარტნიორის როლს რეგიონში“, – ნათქვამია პრესრელიზში. შეხვედრაზე კობახიძემ განაცხადა, რომ „საქართველო მზად არის, მომავალშიც შეუწყოს ხელი რეგიონში ხანგრძლივი მშვიდობისა და სტაბილურობის უზრუნველყოფისკენ მიმართულ ძალისხმევას“.27 მაისს, დელეგაციის წევრები “ქართული ოცნების” საგარეო საქმეთა მინისტრს მაკა ბოჭორიშვილს შეხვდნენ.საქართველოს საგარეო საქმეთა სამინისტროს ინფორმაციით, მხარეებმა ორმხრივი ურთიერთობები და თანამშრომლობის პერსპექტივები განიხილეს. “ყურადღება გამახვილდა ,,შუა დერეფანზე” და საქართველოს, როგორც რეგიონული დამაკავშირებლისა და სატრანსპორტო ჰაბის როლზე”, – ნათქვამია სამინისტროს პრესრელიზში.აშშ-ის საელჩოს განცხადება1 ივნისს, აშშ-ის საელჩომ განცხადება გამოაქვეყნა, რომელშიც ნათქვამია, რომ მხარეებმა „ორმხრივი ურთიერთობების გაუმჯობესების სამომავლო გზა” განიხილეს.განცხადების თანახმად, დელეგაციამ “საქართველოს მთავრობას მასთან კონსტრუქციულ, მომავალზე ორიენტირებულ ურთიერთობასთან დაკავშირებით ტრამპის ადმინისტრაციის მზადყოფნა გაუზიარა და მისი ინტერესი სუვერენულ პარტნიორებს შორის ორმხრივ ურთიერთობებში ურთიერთპატივისცემაზე, საერთო ინტერესებსა და გულწრფელ დიალოგზე დაფუძნებული ახალი ეტაპის დაწყების შესახებ”.ამავე განცხადებაში ნათქვამია, რომ მხარეებმა განიხილეს შეერთებულ შტატებსა და საქართველოს შორის “შესაძლო თანხვედრის” სფეროები, მათ შორის “ეროვნული სუვერენიტეტისადმი საერთო ერთგულება, სამართლიანი ეკონომიკური გარემო, მავნე გარე გავლენებისადმი მდგრადობა და ის ფუნდამენტური ღირებულებები, რომელიც ორივე ერს განსაზღვრავს”. “შეერთებული შტატები ელის საქართველოს მთავრობასთან მუშაობას ისეთი პარტნიორობისთვის, რომელიც ორივე ქვეყანას ხელშესახებ სარგებელს მოუტანს და სრულად აამოქმედებს ორმხრივი ურთიერთობის პოტენციალს”, – ნათქვამია განცხადებაში.შეხვედრა ოპოზიციურ პარტიებთან25 მაისს, აშშ-ის დელეგაცია რამდენიმე ოპოზიციონერ პოლიტიკოსს შეხვდა, მათ შორის “ლელოს” წარმომადგენელ გრიგოლ გეგელიას, “თავისუფლების მოედნის” წარმომადგენელ ლევან ცუცქირიძეს და პარტია „ხალხისთვის“ წარმომადგენელ ანა დოლიძეს.25 მაისს, ცალკე შეხვედრა გაიმართა პარლამენტში ყოფილი პრემიერ-მინისტრის, გიორგი გახარიას პარტია „საქართველოსთვის“ ოპოზიციონერ დეპუტატებთან.„შეხვედრაზე განიხილეს “გახარია საქართველოსთვის” გუნდის საქმიანობა, განსაკუთრებული აქცენტი გაკეთდა საქართველოს საგარეო პოლიტიკაზე, ასევე, პარტიის მიერ ინიცირებულ რეზოლუციაზე რუსეთის ფედერაციასა და ე.წ. სამხრეთ ოსეთის ავტონომიურ რესპუბლიკას შორის გაფორმებულ ხელშეკრულებაზე რეაგირების შესახებ, რაზეც სამწუხაროდ, “ოცნებას” აქამდე ხმა არ ამოუღია”, – განაცხადა პარტიამ “საქართველოსთვის”.აშშ-ის საელჩოს განცხადება1 ივნისის განცხადებაში, საელჩო ოპოზიციის წარმომადგენლებთან დელეგაციის ვიზიტსაც შეეხო.განცხადების თანახმად, დელეგაციამ მოისმინა “შეშფოთება ოპოზიციური პარტიების მიმართ მოპყრობის შესახებ 2024 წლის ოქტომბრის შემდეგ, მათ შორის საკონსტიტუციო სასამართლოში მიმდინარე საქმისა და არსებული პოლიტიკური გარემოს შესახებ”.დელეგაციამ მათ “გაუზიარა შეერთებული შტატების პოზიცია საქართველოს დემოკრატიულ ინსტიტუტებში ოპოზიციის მონაწილეობის შესახებ. ფუნქციონალური დემოკრატია საჭიროებს პოლიტიკურ ოპოზიციას, რომელიც სახელმწიფო ინსტიტუტებთან ურთიერთობს იმ მოქალაქეების ინტერესების წარმოსაჩენად, რომლებმაც მას ხმა მისცეს. პოლიტიკური სტაბილურობა და ოპოზიციის რეალური წარმომადგენლობა იმ ფაქტორებს შორისაა, რომელიც საქართველოს ამერიკული ინვესტიციებისთვის, უსაფრთხოების სფეროში თანამშრომლობისა და გრძელვადიანი სტრატეგიული პარტნიორობისთვის სანდო პარტნიორად აქცევს”.“შეერთებული შტატები ერთგულია კონსტრუქციული ურთიერთობისა ყველა სერიოზულ პოლიტიკურ აქტორთან, რომელიც დაინტერესებულია საკუთარი ქვეყნის სტაბილურობით, სუვერენიტეტითა და კეთილდღეობით”, – ნათქვამია განცხადებაში.შეხვედრა შიო III-სთან27 მაისს აშშ-ის დელეგაცია საქართველოს მართლმადიდებელი ეკლესიის ახლად აღსაყდრებულ კათოლიკოს-პატრიარქს, შიო III-ს შეხვდა. საქართველოს საპატრიარქოში გამართულ შეხვედრას რამდენიმე მაღალი რანგის სასულიერო პირი დაესწრო.საპატრიარქოს განცხადების თანახმად, დელეგაციის წევრებმა შიო III-ს აღსაყდრება მიულოცეს და “რამდენჯერმე ხაზი გაუსვეს მართლმადიდებელი ეკლესიის როლს საქართველოს ისტორიაში”. “საუბარი ასევე შეეხო ორი ქვეყნის ურთიერთობებსა და მათ საერთო ქრისტიანულ ღირებულებებს. მხარეთა მიერ კიდევ ერთხელ გამოითქვა მზაობა თანამშრომლობის გაღრმავებისა და ამ ღირებულებების განმტკიცებისათვის”, – ნათქვამია განცხადებაში.საპატრიარქომ ასევე აღნიშნა, რომ წელს საქართველოში ქრისტიანობის სახელმწიფო რელიგიად გამოცხადების 1700 წლისთავის აღნიშვნასთან დაკავშირებით დაგეგმილ ღონისძიებებზე პატრიარქმა ამერიკის შეერთებული შტატების სახელმწიფო დეპარტამენტის დელეგაცია დაპატიჟა.აშშ-ის საელჩოს განცხადება31 მაისს, აშშ-ის საელჩომ პატრიარქთან შეხვედრის შემდეგ, “ფეისბუქზე” დელეგაციის განცხადება გამოაქვეყნა.განცხადებაში ნათქვამია, რომ დელეგაციამ “ხაზი გაუსვა იმ ცივილიზაციურ კავშირებს, რომელიც აშშ-საქართველოს ურთიერთობების საყრდენს წარმოადგენს. შეერთებული შტატები ამ მეგობრობის საფუძვლად მიიჩნევს საქართველოს ფუნდამენტურ ღირებულებებს, მათ შორის: სარწმუნოებას, ოჯახს, ეროვნულ იდენტობასა და ღრმა პატივისცემას ღვთივბოძებული უფლებებისადმი, რომელიც ადამიანის ღირსებას უზრუნველყოფს”.განცხადებაში ასევე ნათქვამია, რომ აშშ-ის დელეგაციამ ყურადღება გაამახვილა იმ ქრისტიანულ სათნოებებზე, რომელიც საუკუნეების განმავლობაში გამოარჩევდა ქართულ ცივილიზაციას თანაგრძნობითა და გულმოწყალებით, ასევე, “ეკლესიის ისტორიულ მისიაზე, ყოფილიყო ქართველთა შორის შემრიგებლის ხმა. დელეგაციამ იმედი გამოთქვა, რომ ეკლესია ეროვნული ერთიანობის გამტკიცების ამ მისიას განახლებული სულისკვეთებით გააგრძელებს”.“შეერთებული შტატები მოუთმენლად ელის საქართველოს მართლმადიდებელ ეკლესიასთან ურთიერთობის გაღრმავებას”, – ნათქვამია განცხადებაში.This post is also available in:

English Tagsაშშ-საქართველოს ურთიერთობა პიტერ ანდრეოლი ჩარლზ იოქი

Copy URL URL Copied