უნგრეთის მთავრობა საქართველოს, სომხეთის და ფილიპინების მოქალაქეებისთვის სამუშაო ვიზების გაცემას წყვეტს, Reuters-ი იტყობინება.

მთავრობის პრესსპიკერი ვანდა სონდი განმარტავს, რომ ეს გადაწყვეტილება უცხოელი მუშახელის ნაკადის რეგულირებისკენ გადადგმული პირველი ნაბიჯია. ხელისუფლება მიიჩნევს, რომ უცხოელი მუშაკები ადგილობრივ ხელფასებზე ნეგატიურ გავლენას ახდენენ.

ოფიციალური სტატისტიკის მიხედვით, უცხოელი მუშაკები უნგრეთის სამუშაო ძალის მხოლოდ 2%-ს შეადგენენ, თუმცა მომსახურებისა და წარმოების სფეროები მათზე მნიშვნელოვნადაა დამოკიდებული.

ცვლილება ასევე ეხება დადგენილებას, რომელიც დასაქმების სააგენტოებს ფილიპინებიდან, საქართველოდან და სომხეთიდან მუშაკების გამარტივებული წესით ჩამოყვანის საშუალებას აძლევდა.

უნგრეთში უკვე მყოფ უცხოელ დასაქმებულებს ვიზის ვადის გაგრძელების განაცხადის შეტანა კვლავ შეეძლებათ, ხოლო შეტანილი განაცხადები განხილული იქნება. მთავრობა ამ ნაბიჯებს უფრო ფართო, გრძელვადიანი სამიგრაციო პოლიტიკის ჩარჩოდ მიიჩნევს.