29 მაისს დილით უკრაინულმა დრონებმა ორ სამიზნეს ერთდროულად დაარტყეს — ტემრიუკის პორტს კრასნოდარის მხარეში და ვოლგოგრადის „ლუკოილის” ნავთობგადამამუშავებელ ქარხანას.

ვოლგოგრადის ოლქის გუბერნატორმა ანდრეი ბოჩაროვმა განაცხადა, რომ ვოლჟსკის სინთეტიკური ბოჭკოების ქარხანაში ერთი ადამიანი დაიღუპა, ერთი კი მძიმედ დაიჭრა. ვოლგოგრადში, ვერშინინის ქუჩაზე, მრავალბინიანი სახლი დაზიანდა — კიდევ ერთი ადამიანი დაშავდა.

გუბერნატორი „დრონების ნამსხვრევების ჩამოცვენაზე” საუბრობდა — ფორმულირება, რომელსაც რუსეთის ხელისუფლება ამ ტიპის შეტევებისას ხშირად იყენებს, მაშინაც კი, როცა ობიექტი პირდაპირი დარტყმის შედეგად დაზიანდა.

დამოუკიდებელი გამოცემა ASTRA თვითმხილველთა კადრების ანალიზის საფუძველზე წერს, რომ ვოლგოგრადში სამიზნე „ლუკოილის” ნავთობგადამამუშავებელი ქარხანა იყო — რეგიონის უმსხვილესი, წელიწადში 15 მილიონ ტონაზე მეტ ნავთობს ამუშავებს. ASTRA-ს ცნობით, ვერშინინის ქუჩაზე დარტყმული სახლი „ტიტან-ბარიკადების” სამხედრო-სამრეწველო ქარხნიდან სულ ორ კილომეტრშია — ობიექტი, რომელიც საარტილერიო და სარაკეტო ტექნიკას აწარმოებს.

კრასნოდარის მხარეში ოპერატიულმა შტაბმა განაცხადა, რომ ტემრიუკის პორტის ტერიტორიაზე ხანძარი გაჩნდა. ტემრიუკი ტამანის ნახევარკუნძულის უმსხვილესი დასახლებული პუნქტია — პორტი მდინარე ყუბნის შესართავთან, აზოვის ზღვის სანაპიროზე მდებარეობს. 2025 წლიდან პორტში ნავთობის საექსპორტო ტერმინალი მუშაობს; ტემრიუკს დრონებმა 2025 წლის დეკემბერში ორჯერ უკვე დაარტყეს.

უკრაინის თავდაცვის ძალებმა „ლუკოილის” ვოლგოგრადის ქარხანას ადრეც არაერთხელ დაარტყეს.