უკრაინის უსაფრთხოების სამსახურმა (СБУ) რუსეთის ნავთობის სატუმბ სადგურ Второво-ზე, რომელიც მოსკოვს საწვავით ამარაგებს, იერიში მიიტანა. უკრაინამ ამ სადგურს მიმდინარე თვეში უკვე მეორედ დაარტყა.

ამის შესახებ СБУ განცხადებას სოციალურ ქსელში ავრცელებს.

უწყების ინფორმაციით, სადგური კომპანია Транснефть-Верхняя Волга-ს სტრუქტურაში შედის და მსუბუქი ნავთობპროდუქტების საექსპორტო პორტებსა და რუსეთის შიდა მომხმარებლებისთვის ერთ-ერთ საკვანძო ლოგისტიკურ კვანძს წარმოადგენს.

სადგურის მეშვეობით დიზელის საწვავი მიეწოდება მოსკოვის ნავთობპროდუქტების მილსადენს, საიდანაც ის მოსკოვის შემოგარენში მდებარე მსხვილ ნავთობბაზებზე ნაწილდება. ამავე სადგურის გავლით ნავთობპროდუქტები ბალტიის ზღვის პორტების გავლით ექსპორტზეც გადის.

СБУ-ს წინასწარი ინფორმაციით, უპილოტო საფრენმა აპარატებმა ობიექტის ტექნიკური შენობები დააზიანეს.