უკრაინამ და ევროკავშირმა 8,35 მილიარდი ევროს მაკროფინანსური დახმარების მემორანდუმს მოაწერეს ხელი — ეს შეთანხმება ევროკავშირის 90-მილიარდიანი სასესხო პროგრამის ფარგლებშია გათვალისწინებული. ინფორმაციას European Pravda ავრცელებს.

ევროკავშირის ეკონომიკის კომისარმა ვალდის დომბროვსკისმა 20 მაისს მემორანდუმს ხელი ევროკავშირის სახელით მოაწერა. ახლა დოკუმენტის რატიფიკაცია უკრაინის პარლამენტს ევალება.

შეთანხმება უკრაინას შესაძლებლობას მისცემს, 2026 წელს სახელმწიფო ბიუჯეტის მხარდასაჭერად 8,35 მილიარდი ევრო მიიღოს.

კიდევ 8,35 მლრდ ევროს გამოყოფა „უკრაინის ფონდის” მექანიზმის ფარგლებში იგეგმება. მარეგულირებელ ჩარჩოზე მოლაპარაკებები კვლავ მიმდინარეობს და უახლოეს მომავალში დასრულდება.

European Pravda-ს ადრე ცნობილი გახდა, რომ უკრაინა ვალდებული იქნება კანონის უზენაესობისა და ანტიკორუფციული მიმართულებით რეფორმების პაკეტი გაატაროს, რათა ბიუჯეტის მხარდაჭერის ნაწილი მიიღოს. ეს მოთხოვნები ეყრდნობა ევრო-ატლანტიკური ინტეგრაციის საკითხებში უკრაინის ვიცე-პრემიერ ტარას კაჩკასა და ევროკავშირის გაფართოების კომისარ მარტა კოსის მიერ შემუშავებულ გეგმას.