უკრაინამ ევროკავშირის სანქციების მე-20 პაკეტთან სინქრონიზებული ახალი სანქციები დააწესა რუსეთის წინააღმდეგ. პრეზიდენტმა ვოლოდიმირ ზელენსკიმ ხელი მოაწერა ორ დადგენილებას, რომლებიც ეხება 120 ფიზიკურ პირსა და ორგანიზაციას — ნაწილი მათგანი უკრაინის შეზღუდვების ქვეშ უკვე იმყოფებოდა.

ახალი ზომები მოიცავს რუსეთის 16 მოქალაქეს და 31 კომპანიას — რუსეთიდან, ბელარუსიდან, არაბთა გაერთიანებული საამიროებიდან, ყირგიზეთიდან, ყაზახეთიდან, უზბეკეთიდან და დროებით ოკუპირებული ტერიტორიებიდან.

სანქციების სამიზნეთა შორის არიან: პროკურორი ლუდმილა ბალანდინა, მოსამართლე დმიტრი გორდეევი და „როსია-1”-ის გადაცემა „ვესსის” წამყვანი მარია სიტელი. კიევი მათ ადანაშაულებს პოლიტიკურად მოტივირებულ გადაწყვეტილებებში თანამონაწილეობასა და დეზინფორმაციის გავრცელებაში.

შეზღუდვები ასევე დაუწესდა რუსეთის სამხედრო-სამრეწველო კომპლექსის საწარმოებს, მათ შორის — ელექტრონული საბრძოლო სისტემებისა და დრონის კომპონენტების მწარმოებლებს. კერძოდ, სანქციები შეეხო კომპანიებს Atlant Aero და „ირზ-სვიაზს”.