გაერთიანებულმა სამეფომ 26 მაისს გამოაცხადა, რომ სანქციები დაუწესა საქართველოში რეგისტრირებულ სამ კომპანიას, რომლებიც „რუსეთზე ორიენტირებულ ბირჟებს მართავდნენ და სანქციების გვერდის ავლას ცდილობდნენ”. სამივე კომპანია — შპს „არვიქს”, შპს „რაპირა გრუპ” და შპს „ეიაიფორი” — ქართველი საზოგადოებისთვის მანამდე ცნობილი არ ყოფილა.

ბრიტანეთის საელჩომ განმარტა, რომ სანქცირებულ კომპანიებთან დაკავშირებული ტრანზაქციების მოცულობა სულ მცირე 70 მილიონ დოლარს შეადგენს.

ქართული გამოძიება: სამივე კომპანია ფიქტიური იყო

ფინანსთა სამინისტროს საგამოძიებო სამსახურმა 27 მაისს განაცხადა, რომ „ეიაიფორი” და „არვიქს” „ფიქტიურად, გარკვეული ანაზღაურების სანაცვლოდ, სხვა პირების სახელზე იყვნენ დარეგისტრირებული, რეალურად კი მოსკოვიდან ოპერირებდნენ — საქართველოს ტერიტორიაზე არც აქტივები ჰქონდათ და არც ოფისები.”

2026 წლის 28 აპრილს სასამართლოს განაჩენით სამ ბრალდებულს 30 000 ლარის ჯარიმა და პირობითი სასჯელი დაეკისრა, ხოლო „ბოსს”, დავით ჯინჭარაძეს — 9 წელი და 6 თვის პატიმრობა.

„რაპირა გრუპ” ბრიტანელი მოქალაქის მინდობილობით ემსახურებოდა ექსკლუზიურად რუსი კლიენტებს — სამსახური ვებგვერდ rapira.net-ის მეშვეობით ეწეოდა ბიზნესს, კომპანიის დომენიც რუსულ რეგისტრატორთან იყო გაფორმებული.

ეროვნული ბანკი: კომპანიები VASP სიაში არ იყვნენ

ეროვნულმა ბანკმა განაცხადა, რომ სამივე კომპანია მის მიერ ლიცენზირებული ვირტუალური აქტივის მომსახურების პროვაიდერის სიაში (VASP) არ ყოფილა. 2025 წლის სექტემბერში, რაც გაიგო, რომ კომპანიები ლიცენზიის გარეშე მოქმედებდნენ, ბანკმა „მიაწოდა ინფორმაცია სამართალდამცავ სტრუქტურებს”. ამჟამად საქართველოში VASP-ად 39 სუბიექტია რეგისტრირებული.