სახელმწიფო უსაფრთხოების სამსახურმა 5 მაისს გიორგი უძილაური დააკავა — ფინანსთა სამინისტროს საგამოძიებო სამსახურის ყოფილი პრესსამსახურის უფროსი ჯაშუშობის ბრალდებით. სუსი ამბობს, რომ უძილაური უცხო ქვეყნის სპეცსამსახურს სისტემატურად აწვდიდა საიდუმლო ინფორმაციას. „რუსთავი 2” გადამცემი მიუთითებს, რომ იგი ერთ-ერთი ევროპული ქვეყნის სასარგებლოდ ჯაშუშობდა.

სუსის უფროსის მოადგილემ ლაშა მაღრაძემ ბრიფინგზე განაცხადა, რომ უძილაური „ამჟამინდელი სამსახურებრივი მდგომარეობისა და წარსულში დაკავებული თანამდებობების” საფუძველზე, „სხვადასხვა უწყებაში არსებული პირადი კავშირების მეშვეობით” ახდენდა ინფორმაციის შეგროვებასა და გადაცემას.

მაღრაძის მიხედვით, შეხვედრები სპეცსამსახურის წარმომადგენელთან „დაშიფრული ორმხრივი კავშირის გამოყენებით” იგეგმებოდა, ხოლო გადაცემული ინფორმაცია სახელმწიფოს პოლიტიკურ-ეკონომიკური პროცესების, ძალოვანი სტრუქტურებისა და ეთნიკური-რელიგიური უმცირესობების შესახებ მონაცემებს მოიცავდა.

სანამ ფინანსთა სამინისტროში გადასვლამდე, უძილაური ბიძინა ივანიშვილის „ქართუ” ბანკის PR-სამსახურს ხელმძღვანელობდა.