ჯაშუშობის ბრალდებით 5 მაისს დაკავებული გიორგი უძილაურის ადვოკატმა ბექა გულედანმა „ინტერპრესნიუსს” კლიენტის პოზიცია გააცნო. ადვოკატის თქმით, უძილაური პოლიტიკური პატიმარია — მისი დაჭერა პოლიტიკური სიგნალი გახლდათ ყველა იმ საჯარო მოხელისთვის, ვინც სახელმწიფო პროპაგანდისგან განსხვავებულად ფიქრობს.

გულედანის განცხადებით, უძილაური ფინანსთა სამინისტროს საგამოძიებო სამსახურის საზოგადოებასთან ურთიერთობის სამმართველოს უფროსობის პარალელურად ღიად ერთვებოდა პოლიტიკაში: ორჯერ ესწრა პროევროპულ სტუდენტთა საპროტესტო აქციებს რუსთაველის გამზირზე, ხოლო სახელმწიფო სამსახურში ყოფნის პერიოდში ინარჩუნებდა NGO „ევროპული არჩევანი საქართველოსთვის”-ის დირექტორის თანამდებობას. მისი ტელეფონები ისმინებოდა, ინტერნეტ-ტრაფიკი მონიტორინგს ექვემდებარებოდა, სამსახურებრივი ავტომობილის ადგილსამყოფელი ფიქსირდებოდა — ამის მიუხედავად, უძილაური კომუნიკაციებს არ ზღუდავდა.

ადვოკატის სიტყვებით, მისი კლიენტი ეწინააღმდეგებოდა ხელისუფლების ანტიდასავლურ პოლიტიკას, ოცნების წევრებთანაც კი ღიად გამოთქვამდა პრეტენზიებს. ბოლო ამოცანა, რომელსაც უარი უთხრა, ეკა ბესელიას „გაშავება” იყო.

„გიორგი იხსენებს, რომ ბოლოს უარი თქვა ეკა ბესელიას „გაშავებაზე” და იცოდა, რომ მალე მასთანაც მივიდოდნენ,” — განაცხადა გულედანმა.

ადვოკატი ასევე გადმოსცემს კლიენტის შეფასებას ქართული ოცნების ევოლუციაზე: 2011-2012 წლების ბრძოლის იდეალები ჩანაცვლდა „მედროვეთა ინტერესებით”. მის თქმით, უძილაური ივანიშვილის 20-კაციანი გუნდის ერთ-ერთი ადრეული წევრია, ესწრებოდა 2011-2012 წლების ოპოზიციურ საქმიანობას, სადაც ამერიკელი და ევროპელი სპეციალისტებიც მონაწილეობდნენ — ესეც, ადვოკატის განმარტებით, „ჯაშუშობის” ბრალდების საფუძველს ქმნის.

„გიორგი უძილაური აღიარებს, რომ მისმა პოლიტიკურმა პოზიციამ და იდეალებმა პატიმრად აქცია — პოლიტიკურ პატიმრად, რადგან მისი დაჭერა პოლიტიკური სიგნალი იყო ყველა იმ საჯარო მოხელისთვის, ვინც პროპაგანდისგან განსხვავებულად ფიქრობს. მშვიდობის გარანტია ევროპა — და არა რუსული ჩექმის ამბორი და ცახცახი,” — ასრულებს გულედანი.

უძილაური ბრალდებულია სისხლის სამართლის კოდექსის 314-ე მუხლის პირველი ნაწილით (ჯაშუშობა), რაც 8-დან 12 წლამდე პატიმრობით ისჯება. „რუსთავი 2”-ის ინფორმაციით, მაღალჩინოსანი ერთ-ერთი ევროპული სახელმწიფოს სასარგებლოდ ჯაშუშობდა — სწორედ ეს პირი გიორგი უძილაურია.