საქართველოს პარლამენტში შინაგან საქმეთა სამინისტროს ავტორობით, მთავრობის ინიციატივით, ახალი საკანონმდებლო პაკეტი დარეგისტრირდა — 10-მდე კანონში ცვლილებებს აერთიანებს. პარლამენტი დაჩქარებული წესით განიხილავს: ნორმები 2026 წლის 1 ივლისიდან უნდა ამოქმედდეს.

რას ითვალისწინებს კანონი

სისხლის სამართლის კოდექსის 73-ე მუხლში დაგეგმილი ცვლილებებით, უცხოელ მსჯავრდებულს სასჯელის მოუხდელი ნაწილი შეიძლება შეუცვლათ საქართველოდან გაძევებითა და ქვეყანაში შემოსვლის აკრძალვით. ამ ზომის ამოქმედება უცხოელის თანხმობას არ მოითხოვს.

გადაწყვეტილებას სპეციალური პენიტენციური სამსახურის ადგილობრივი საბჭო იღებს სასამართლოს ჩარევის გარეშე. შინაგან საქმეთა სამინისტრო გადაწყვეტილებას სრულდება.

სასჯელის შეცვლა შესაძლებელია მას შემდეგ, რაც მსჯავრდებული ფაქტობრივად მოიხდის:

• ნაკლებად მძიმე დანაშაულისთვის — სასჯელის ვადის არანაკლებ ერთ მესამედს,
• მძიმე დანაშაულისთვის — არანაკლებ ნახევარს,
• განსაკუთრებით მძიმე დანაშაულისთვის — არანაკლებ ორ მესამედს,
• უვადო პატიმრობის შემთხვევაში — 15 წელს.

გასაჩივრება შესაძლებელია, მაგრამ ეს გაძევების შეჩერებას არ იწვევს.

ადვოკატების კრიტიკა

იურისტი რუსუდან მჭედლიშვილი, რომელიც უცხოელ მიგრანტთა უფლებებს იცავს, ინიციატივაში სამართლებრივ შეუსაბამობებს ხედავს: „ეს კანონპროექტი უცხოელ და ქართველ მსჯავრდებულებს არათანაბარ პირობებში აყენებს. ქართველის შემთხვევაში სასჯელის შეცვლა თანხმობას მოითხოვს, უცხოელის შემთხვევაში — არა.”

მჭედლიშვილი ასევე აღნიშნავს, რომ კანონპროექტი ინდივიდუალური გარემოებების — საოჯახო კავშირები საქართველოში, არასრულწლოვანი შვილები, ქვეყანაში ხანგრძლივი ცხოვრება — სრულ შეფასებას არ ითვალისწინებს.

სოციალურ ქსელებში ცვლილებები საქართველოს ყოფილ პრეზიდენტს, ამჟამად მსჯავრდებულ მიხეილ სააკაშვილს უკავშირება — უკრაინის მოქალაქეს.