ბულგარეთის ქალაქ ბლაგოევგრადში, „ხრისტო ბოტევის” სტადიონზე გამართულ ამხანაგურ მატჩში საქართველოს 21-წლამდე ნაკრები აშშ-ს 20-წლამდე ნაკრებს 0:1 დაუთმო. საკადრო სირთულეების გამო სვანაძემ ვერ გამოიძახა გაბრიელ სიგუა, ალეკო ბასილაძე, გიორგი გვასალია, ირაკლი ეგოიანი, საბა ხარებაშვილი და ანდრია ბართიშვილი.

41-ე წუთზე საქართველოს სასარგებლოდ პენალტი დაინიშნა — სანდრო ნარიმანიძემ კარს ააცილა. ერთადერთი გოლი 80-ე წუთზე გავიდა: ოუენ პრესტუსმა მარჯვენა ფლანგიდან ჩააწოდა, ბრის ჯეიმისონმა ახლოდან ზუსტად დაარტყა.

შემადგენლობა: მაქაცარია, ბუკია, ნარიმანიძე, ამისულაშვილი, ტაბატაძე, ლორთქიფანიძე (პარკაძე 62), წულუკიძე (ღურწკაია 12), დადიანი (ქვარცხავა 81), ცეცხლაძე, ჯაფარიძე (ზოიძე 90), დეისაძე (კოხრეიძე 62).

სვანაძე მატჩის შემდეგ: „განსხვავებული სტილის გუნდს ვეთამაშეთ, ძალიან კარგი შედეგებით. შეხვედრის ბოლოს გაგვიჭირდა — ფიზიკური მომზადების სხვაობა ძალიან დიდი იყო, ეს კი თვალნათლივ ჩანდა. მთავარი საზრუნავი სექტემბრის ურთულესი თამაშებია და ყველანაირად ვეცდებით, მზადყოფნაში შევხვდეთ.”

შემდეგ შეხვედრას U21 ნაკრები 9 ივნისს მოლდოვის ქალაქ ნისპორენში გამართავს.