ოკუპირებული სამხრეთ ოსეთის ჯავის რაიონში, სოფელ ძღუბირის მახლობლად მდინარე ლიახვში 21 მაისს, სავარაუდოდ საღამოს საათებში, ჩავარდნილ რუსეთის მოქალაქეს — რეჟისორ ანა ტიცს (დ. 1974) — 23 მაისის მდგომარეობით ვერ პოულობენ. სამძებრო ოპერაციაში 200-მდე ადამიანია ჩართული.

ანა ტიცი ოკუპირებულ ცხინვალში ჩასულ გადამღებ ჯგუფს ახლდა — ჯგუფი უკრაინის წინააღმდეგ რუსეთის სრულმასშტაბიანი ომის ე.წ. „სპეციალური სამხედრო ოპერაციის” მონაწილე ცხინვალელების შესახებ დოკუმენტურ ფილმს იღებდა.

ოკუპირებული ცხინვალის დე ფაქტო საგანგებო სიტუაციების სამსახურის ცნობით, 22 მაისს ქალის ტანისამოსი იმ ადგილიდან 500–700 მეტრის მოშორებით იპოვეს. ოკუპირებული ცხინვალის ე.წ. ხელმძღვანელობამ დაკარგული მოქალაქის ძებნაში დახმარება ქართულ მხარეს სთხოვა, რის შემდეგაც ქართველი მაშველებიც შეუერთდნენ ოპერაციას. სამძებრო სამუშაოებს ე.წ. პრეზიდენტი ალან გაგლოევი ზედამხედველობს.