სომეხმა მილიარდერმა და ოპოზიციური „აყვავებული სომხეთის” ლიდერმა გაგიკ ცარუკიანმა ახალი ამბიციური პროექტი გამოაცხადა: 33-მეტრიანი იესო ქრისტეს ქანდაკების მშენებლობის დასრულების შემდეგ ის ნოეს კიდობნის მონუმენტური მემორიალის შექმნას გეგმავს. ამის შესახებ OC Media წერს.

ცარუკიანი ამტკიცებს, რომ ეს ნაგებობები მილიონობით ტურისტს მიიზიდავს. საკუთარ საარჩევნო პროგრამას, რომელსაც „წინადადება სომხეთისთვის” ეწოდება, მან „პოლიტიკური და სამოქალაქო ნოეს კიდობანი” უწოდა — სომხეთის „ხსნისა და აღორძინების” გეგმა.

ოთხშაბათს ტავუშის რეგიონში ცარუკიანმა პრემიერმინისტრ ნიკოლ ფაშინიანის პოლიტიკა გააკრიტიკა. OC Media-ს ცნობით, მან ყალბი ინფორმაციაც გაავრცელა — განაცხადა, რომ ფაშინიანი ქვეყანაში 300 000 აზერბაიჯანელის შეშვებას გეგმავდა.

ხელისუფლებაში მოსვლის შემთხვევაში, ცარუკიანი სომხეთის უსაფრთხოების გარანტად რუსეთს, ჩინეთს, ინდოეთსა და პაკისტანს მოიხსენიებს — ქვეყნებს, რომლებმაც სომხეთთან დიპლომატიური ურთიერთობები მხოლოდ 2025 წელს დაამყარეს. მათი მხარდაჭერის მოპოვების კონკრეტულ მექანიზმს კი ოპოზიციელი ლიდერი არ აკონკრეტებს.

იესო ქრისტეს ქანდაკების მშენებლობა 2025 წლის ნოემბერში დაიწყო.