ამერიკის შეერთებული შტატების პრეზიდენტი დონალდ ტრამპი მიიჩნევს, რომ უკრაინაში ომის დასრულება „ძალიან ახლოსაა”. ეს ტრამპმა ვაშინგტონში ჟურნალისტებს განუცხადა ჩინეთში სახელმწიფო ვიზიტით გამგზავრებამდე.

ჟურნალისტის შეკითხვაზე — არის თუ არა პუტინთან „ურთიერთგაგება” რუსეთის მიერ მთელი დონბასის მიღების შესახებ — ტრამპმა უარყოფითად უპასუხა.

რუსეთი ომის დასრულების ერთ-ერთ მთავარ პირობად ასახელებს უკრაინის ჯარების მიერ დონბასის სრულად დატოვებას, თუმცა კიევი ტერიტორიების დათმობაზე მსჯელობას გამორიცხავს.

2026 წლის იანვრის მეორე ნახევრიდან სამი მოლაპარაკების რაუნდი გაიმართა. პროცესი შეჩერდა თებერვლის ბოლოდან — ირანის წინააღმდეგ აშშ-ისრაელის სამხედრო ოპერაციის დაწყების შემდეგ.

9 მაისს, მოსკოვში, პუტინმა ჟურნალისტებს განუცხადა, რომ საბრძოლო მოქმედებები „დასრულებას უახლოვდება”, თუმცა კონკრეტულად არ განუმარტა, რით დასრულდება ომი.