აშშ-ის პრეზიდენტი დონალდ ტრამპი ირანთან მიმდინარე შეთანხმების ტექსტში ცვლილებებს ითხოვს, — ამის შესახებ Axios-ი წყაროებზე დაყრდნობით იტყობინება.

ტრამპს სურს, შეთანხმება უფრო კონკრეტურად განსაზღვრავდეს, თუ როგორ და როდის მიიღებს აშშ ირანის მაღალი გამდიდრების ურანს. ამავდროულად, თეთრი სახლი ჰორმუზის სრუტით ტრანზიტთან დაკავშირებული ზოგიერთი დებულების გადახედვასაც ითხოვს.

New York Times-ი ასევე იუწყება, რომ ტრამპს სურს გადახედოს იმ პირობებს, რომლებიც უცხოეთში გაყინული ირანის აქტივების გათავისუფლებას ეხება.

Axios-ის წყაროების ცნობით, ადმინისტრაცია კვლავ „წარმატებულ შეთანხმებას” ელის, თუმცა ხელმოწერის ვადა გაურკვეველია — „შეიძლება რამდენიმე დღეში, შეიძლება მოგვიანებით.”

მოლაპარაკებებზე ირანის მხრიდან წარმომადგენელი მოჰამედ ბაღერ ღალიბაფი 31 მაისს განაცხადა, რომ ირანი ვერ მიიღებს ვერცერთ შეთანხმებას, თუ დარწმუნებული არ იქნება, რომ „ირანელი ხალხის უფლებები” დაცულია.

მემორანდუმის პროექტი, მედიის ინფორმაციით, შესაძლოა ითვალისწინებდეს 60-დღიან ცეცხლის შეწყვეტის გახანგრძლივებას, ირანის ბირთვულ პროგრამაზე მოლაპარაკებების დაწყებას და ჰორმუზის სრუტეში ნაოსნობის სრულ აღდგენას. ამ ეტაპზე გადაუჭრელი საკითხებია ბლოკადის მოხსნის ვადები და სანქციების შემსუბუქება.