ანკარაში NATO-ს სამიტის ფარგლებში აშშ-ს პრეზიდენტი დონალდ ტრამპი უკრაინის პრეზიდენტ ვოლოდიმირ ზელენსკის შეხვდება. ამის შესახებ 5 ივლისს თეთრმა სახლმა განაცხადა.

განცხადება ერთი დღის შემდეგ გაკეთდა, რაც ტრამპმა სატელეფონო საუბრები გამართა როგორც ზელენსკისთან, ისე რუსეთის პრეზიდენტ ვლადიმირ პუტინთან.

სატელეფონო საუბრის შემდეგ ზელენსკიმ განაცხადა, რომ ტრამპს ფრონტზე არსებული ვითარების შესახებ ინფორმაცია მიაწოდა და ორივე ლიდერი შეთანხმდა, რომ NATO-ს სამიტზე მოლაპარაკებებს გააგრძელებდნენ.

“არსებობს ამ ომის დასრულების რეალური შესაძლებლობა და ამერიკის სიმტკიცე ამ პროცესში გადამწყვეტია” - დაწერა ზელენსკიმ სოციალურ ქსელ X-ში.

ზელენსკიმ ასევე აღნიშნა, რომ სადაზვერვო მონაცემების მიხედვით, რუსეთი უკრაინის წინააღმდეგ კიდევ ერთი მასშტაბური საჰაერო შეტევისთვის ემზადება.

“ეს პუტინის ხელწერაა - აშშ-ს დამოუკიდებლობის დღის შემდეგ და ანკარაში NATO-ს სამიტის წინ. რუსეთს სურს კიდევ უფრო მეტი ბოროტება ჩაიდინოს და ადამიანები მოკლას” - განაცხადა ზელენსკიმ 5 ივლისს გავრცელებულ ვიდეომიმართვაში.

კრემლის ცნობით, ტრამპსა და პუტინს შორის დაახლოებით 90-წუთიანი სატელეფონო საუბრის დროს ტრამპმა კიდევ ერთხელ დაადასტურა მზადყოფნა, გააგრძელოს შუამავლობის ძალისხმევა, ხოლო პუტინმა გაიმეორა მოსკოვის პოზიცია, რომლის თანახმადაც ნებისმიერი შეთანხმება უნდა ითვალისწინებდეს რუსეთის “ფუნდამენტურ მიდგომას” კონფლიქტის მოგვარების საკითხში.