დონალდ ტრამპი ამ კვირაში გეგმიური შემოწმებისთვის უოლტერ რიდის ეროვნულ სამხედრო სამედიცინო ცენტრს ეწვია — მისი მეორე საპრეზიდენტო ვადის მანძილზე მესამე ვიზიტი. 79 წლის პრეზიდენტმა შემოწმების შემდეგ სოციალურ ქსელში დაწერა, რომ „ყველაფერი იდეალურად იყო”, თუმცა დეტალური სამედიცინო ანგარიში ამ დრომდე არ გამოქვეყნებულა.

ბოლო თვეებში ამერიკულ მედიაში ტრამპის ჯანმრთელობაზე კითხვები გახშირდა. პრეზიდენტი რამდენჯერმე გამოჩნდა დალურჯებული ხელებით — თეთრი სახლი ამას ხშირი ხელის ჩამორთმევით და ასპირინის ყოველდღიური მიღებით ხსნის. ასევე გავრცელდა ინფორმაცია ფეხების შეშუპების შესახებ; ოფიციალური ახსნა — ქრონიკული ვენური უკმარისობა, ასაკოვანი ადამიანებში ჩვეული მდგომარეობა.

ცალკე განხილვის საგანი გახდა სავარაუდო დაღლილობა. ზოგიერთი ექიმი და კომენტატორი ამტკიცებს, რომ ტრამპს საჯარო შეხვედრებზე ჩაძინების ეპიზოდები ჰქონდა. პრეზიდენტი ბრალდებებს უარყოფს: „თვალებს ვასვენებ”.

Washington Post-ის, ABC News-ისა და Ipsos-ის გამოკითხვის თანახმად, ამერიკელთა 59% თვლის, რომ ტრამპს პრეზიდენტისთვის საჭირო გონებრივი სიმკვეთრე აღარ აქვს, ხოლო 55% მიაჩნია, რომ ფიზიკური ჯანმრთელობაც არასათანადოა. თეთრი სახლის ექიმი შონ ბარბაბელა ამ შეფასებებს არ ეთანხმება — ტრამპი, მისი სიტყვებით, „საერთო ჯამში შესანიშნავ მდგომარეობაშია”.

ტრამპის მხარდამჭერები ხშირად შენიშნავენ, რომ თითქმის 80 წლის ასაკშიც ის ენერგიულ პოლიტიკურ საქმიანობას აგრძელებს. პრეზიდენტების ჯანმრთელობის შესახებ ინფორმაციის გამოქვეყნება აშშ-ში კანონით სავალდებულო არ არის.