აშშ-ის პრეზიდენტმა დონალდ ტრამპმა 11 მაისს განაცხადა, რომ ირანთან ზავი „სულს ღაფავს” — მას შემდეგ, რაც თეირანის საპასუხო წინადადება უარყო. ეს კიდევ უფრო ზრდის შეშფოთებას ათ კვირაზე მეტი ხნის კონფლიქტში ბრძოლის განახლების თაობაზე, რომელმაც ათასობით ადამიანი იმსხვერპლა და ენერგიის მიწოდება შეაფერხა.

ვაშინგტონის შემოთავაზების რამდენიმე დღის შემდეგ ირანმა გასცა პასუხი, რომელიც ომის ყველა ფრონტზე — ლიბანის ჩათვლით — შეჩერებას ითვალისწინებდა. ლიბანში ირანის მიერ მხარდაჭერილ ჰეზბოლას ისრაელი ებრძვის. ტრამპმა ეს წინადადება მყისიერად უარყო.

„ვიტყოდი, რომ ახლა ის ყველაზე სუსტია, იმ ნაგვის ნაგლეჯის წაკითხვის შემდეგ, რომელიც მათ გამოგვიგზავნეს. არც დამისრულებია მისი კითხვა,” — განაცხადა ტრამპმა ჟურნალისტებთან.

ირანის პასუხი შეიცავს რამდენიმე მოთხოვნას: ომით მიყენებული ზარალის კომპენსაცია, სუვერენული უფლება ჰორმუზის სრუტეზე, საზღვაო ბლოკადის გაუქმება, ბომბარდირების შეწყვეტის გარანტია, სანქციების მოხსნა და ირანის ნავთობის ექსპორტზე დაწესებული აკრძალვის გაუქმება.

ვაშინგტონის საწყისი წინადადება კი ითვალისწინებდა სამხედრო მოქმედებების შეჩერებას გრძელვადიანი სამშვიდობო ჩარჩოს მოლაპარაკებამდე.