ამერიკის პრეზიდენტმა დონალდ ტრამპმა 11 მაისს უარყო ირანის პასუხი სამშვიდობო წინადადებაზე და განაცხადა, რომ ირანთან ზავი „სულს ღაფავს”. ეს განცხადება გახდა მიზეზი შეშფოთებისა, რომ 10 კვირიანი კონფლიქტი — რომელმაც ათასობით ადამიანი შეიწირა და ენერგიის მიწოდება შეაფერხა — შეიძლება კვლავ გამძაფრდეს.

„ვიტყოდი, რომ ახლა ის ყველაზე სუსტია, იმ ნაგვის ნაგლეჯის წაკითხვის შემდეგ, რომელიც მათ გამოგვიგზავნეს. არც დამისრულებია მისი კითხვა”, — განუცხადა ტრამპმა ჟურნალისტებს.

ირანის პასუხი ვაშინგტონის წინადადებაზე ითვალისწინებდა ომის ყველა ფრონტზე დასრულებას — მათ შორის ლიბანის ფრონტზე, სადაც ამერიკის მოკავშირე ისრაელი ჰეზბოლასთან იბრძვის. ჰეზბოლა — გასამხედროებული ჯგუფი და პოლიტიკური პარტია ერთდროულად — შეერთებული შტატების მიერ ტერორისტულ ორგანიზაციად არის მიჩნეული.

ირანმა ასევე მოითხოვა ომით მიყენებული ზარალის კომპენსაცია, ჰორმუზის სრუტეზე სუვერენიტეტის აღიარება, საზღვაო ბლოკადის გაუქმება, სანქციების მოხსნა და ირანის ნავთობზე დაწესებული აკრძალვის გაუქმება.

აშშ-ის საწყისი წინადადება კი ითვალისწინებდა მხოლოდ საბრძოლო მოქმედებების დასრულებას — ირანის ატომური პროგრამა შემდგომი მოლაპარაკებების საგნად უნდა გამხდარიყო.

ტრამპი ახლო მომავალში ჩინეთს ეწვევა, სადაც, მისივე განცხადებით, ახლო აღმოსავლეთში არსებულ ვითარებასაც განიხილავს.