აშშ-ის მთავრობა 250-დოლარიანი ბანკნოტის გამოშვებას გეგმავს, რომელზეც დონალდ ტრამპი გამოისახება. BBC-ის ცნობით, ეს გადაწყვეტილება ამერიკელი კანონმდებლების თანხმობას საჭიროებს — ფედერალური კანონი ცოცხალი ადამიანის სახის ვალუტაზე დატანას კრძალავს. კონგრესში ტრამპის მოკავშირეებმა უკვე შეიტანეს კანონპროექტი, რომელიც ამ აკრძალვისთვის გამონაკლისს ითვალისწინებს.

სახაზინო დეპარტამენტის სპიკერმა BBC-ს განუცხადა, რომ უწყება კანონპროექტის საპასუხოდ „სათანადო დაგეგმვასა და კომპლექსურ შემოწმებას ახორციელებს”. გრავირებისა და ბეჭდვის ბიურომ (BEP) უკვე მოითხოვა კუპიურის სამხატვრო კონცეფციები, რომლებიც საჯაროდ ჯერ არ გამოქვეყნებულა.

კანონმდებლები, რომლებიც ინიციატივის უკან დგანან, ამბობენ, რომ ნომინალი — 250 — ქვეყნის 250 წლის იუბილეს ასახავს. სახაზინო დეპარტამენტმა განაცხადა: „თუ ეს საკანონმდებლო მანდატი კანონად იქცევა, BEP პროაქტიულად იმოქმედებს 250-დოლარიანი სამახსოვრო ბანკნოტის დასამზადებლად.”

კანონპროექტს ესაჭიროება წარმომადგენელთა პალატისა და სენატის თანხმობა. სახაზინო მდივანმა სკოტ ბესენტმა განაცხადა, რომ ამ საქმეში „ყველაფერი კონგრესის ხელშია” და არ მიაჩნია, „რომ რამე მიუღებელია” საიუბილეო კუპიურაზე პრეზიდენტის სახის გამოსახვაში, „ვინც ქვეყნის 250 წლის იუბილეს დროს თანამდებობას იკავებს.”