აშშ-ის პრეზიდენტმა დონალდ ტრამპმა ოთხშაბათს განაცხადა, რომ ამ კვირაში “შესანიშნავი” საუბარი ჰქონდა რუსეთის პრეზიდენტ ვლადიმირ პუტინთან და რომ რუსეთის ლიდერს გარიგების მიღწევა სურს უკრაინაში ომის დასასრულებლად.

“მას გარიგების მიღწევა უნდა და თუ [უკრაინის პრეზიდენტს, ვოლოდიმირ] ზელენსკიზეც სურს გარიგება, ეს ძალიან კარგი იქნებოდა”, - უთხრა ტრამპმა ჟურნალისტებს, სანამ დალასში გაფრინდებოდა, რესპუბლიკური პარტიის ყრილობაზე.

ტრამპი პუტინს სამშაბათს ელაპარაკა ტელეფონით - მალევე მას მერე, რაც აშშ-ის საგანგებო წარმომადგენელი სტივ უიტკოფი და ტრამპის სიძე ჯარედ კუშნერი დაბრუნდნენ მოსკოვსა და კიევში ჩატარებული დიპლომატიური ტურნედან. უიტკოფმა და კუშნერმა - რომლებიც აშშ-ის სახელით სამშვიდობო მოლაპარაკებების უმეტესობას აწარმოებენ - ვიზიტების ფარგლებში განიხილეს ომის დასრულების შესაძლებლობები.

გასულ თვეში ცენტრალური სადაზვერვო სააგენტოს (CIA) დირექტორი ჯონ რეტკლიფი მოსკოვში შეხვდა დაზვერვის წარმომადგენლებს, ნაწილობრივ იმ მიზნით, რომ რუსეთის ოფიციალური პირები დაერწმუნებინა უკრაინაში შეჭრის დასრულებაში.

სააგენტო Reuters-ის თანახმად, ამ ძალისხმევისა და ტრამპის განცხადებების მიუხედავად, აშშ-ში, უკრაინასა და ევროპაში დაზვერვის სტრუქტურების წარმომადგენლებს კვლავაც ეჭვი ეპარებათ იმაში, რომ პუტინი სერიოზულადაა დაინტერესებული ომის დასრულებაში.

“შეფერხება გამოწვეულია ორი ადამიანით, რომლებსაც ერთმანეთი სძულთ”, - უთხრა ტრამპმა ჟურნალისტებს პუტინსა და ზელენსკიზე. “ვფიქრობ, უწინარესად ესაა. ორი ადამიანი, რომლებსაც ერთმანეთი სძულთ”.