„საერთაშორისო გამჭვირვალობა — საქართველომ” (TI Georgia) გამოაქვეყნა გამოძიება, რომელიც ცხადყოფს: ყველა 8 ლიცენზირებული TIR PARK-ი, რომლებიც საბაჟო-გამშვებ პუნქტებთანაა მოწყობილი, ქართული ოცნების წარმომადგენლების ან მათთან დაკავშირებული ბიზნესმენების საკუთრებაა. ამ კომპანიებმა პარტიასა და მოკავშირეებს 2014 წლიდან ჯამში 1,991,000 ლარი შესწირეს.

TI Georgia-ს ინფორმაციით, კონკრეტული შემთხვევები ასეთია: სარფის TIR PARK-ის „ფიგოილის” 50%-ის მფლობელია ქართული ოცნების სხდომებზე მომსვლელი და მსხვილი შემწირველი, პარლამენტის წევრი გიორგი ჭყონია; წითელი ხიდის TIR PARK-ი „ხალხის ძალის” ლიდერ ვიქტორ ჯაფარიძის მეუღლეს ეკუთვნოდა; გუგუთისა და სადახლოს TIR PARK-ები კახა კალაძესთან და ვახტანგ გომელაურთან დაახლოებული ძმები გიორგი და რომან აბრამიშვილების ხელშია; ლაგოდეხის TIR PARK ოდესღაც ქართული ოცნების მხარდამჭერ ბიზნესმენ მინდია საბანაძეს ეკუთვნოდა.

2014 წლიდან სახელმწიფო პოლიტიკა ავალდებულებს ყველა სატვირთო მანქანას, საბაჟო გამშვებ პუნქტში მისვლამდე, გამშვების სიახლოვეს მდებარე ლიცენზირებულ TIR PARK-ში განთავსდეს. ამ სერვისისთვის ერთი ტრაილერი 80 ლარს იხდის — ფაქტობრივად, რიგის მართვის გარდა სხვა მომსახურება არ ხდება.

TI Georgia-ს შეფასებით, ეს სქემა სახელმწიფო ინფრასტრუქტურის კომბინაციას ქმნის მმართველი პარტიის ფინანსურ ინტერესებთან.