თეონა გაბაძე, რომელიც 2022 წლიდან ბიოლოგიურ ტყუპ შვილებს ეძებს, ახლა სხვა დაზარალებულ ოჯახებსაც ეხმარება. 2000 წელს ქუთაისის სამშობიარო კლინიკაში მას ახალშობილები მკვდრად გამოუცხადეს — 26 წლის შემდეგ კი გაირკვა, რომ ბავშვები, სავარაუდოდ, ცოცხლები არიან.

„ნარკოზიდან გამოსვლისას გავიგონე, რომ საუბრობდნენ, ორივე მოკვდაო — არადა ჩემ დამ მითხრა, ბავშვების ტირილის ხმა ისმოდა,” — ამბობს თეონა.

დღეს ის ფეისბუქ ჯგუფ „ჩვენ გეძებთ”-ის ადმინისტრატორია და ამავე სახელწოდების საქველმოქმედო ფონდის დამფუძნებელი. ორგანიზაცია ეხმარება ბიოლოგიური ოჯახების პოვნაში გაშვილებულ ადამიანებს და მათ, ვისაც ჩვილობაში სამშობიაროში „მოკვდინეს”.

„მინდა მოვუწოდო ყველა აღმზრდელ დედას — სიმართლე უთხარი ბავშვებს. ნუ გაიმეტებ შვილის მომავალს სისხლის აღრევის ცოდვისთვის,” — წერს თეონა სოციალურ ქსელში.

თეონა გაბაძის მოთხოვნით სისხლის სამართლის საქმე უკვე აღძრულია, პარალელურად დამოუკიდებელ გამოძიებასაც ატარებს. ის ხაზს უსვამს, რომ ქვეყანაში პრაქტიკულად ოჯახი ვერ მოიძებნება, რომელსაც ეს პრობლემა პირდაპირ ან ირიბად არ შეხებია — სწორედ ეს ზრდის ინცესტის ალბათობას.

ფონდი გთავაზობს უფასო დნმ-ტესტირებას, ეხმარება ბიოლოგიური ნათესაური კავშირების დადგენაში და გაშვილებული ადამიანების ძიებაში. ამ სისტემის არარსებობამ, თეონას თქმით, გამოიწვია მძიმე სამედიცინო შედეგები ოჯახებში, სადაც სისხლი ერია — ეს კი სრულიად კანონმდებლობის ხარვეზია.

„ვიდრე ჩემს შვილებს არ ვიპოვი, ვიქნები მებრძოლი დედა, რომელიც ყველა საფეხურს გაივლის სიმართლის საძებნელად,” — ამბობს იგი.