საქართველოს ყინულის ჰოკეის ფედერაციამ IIHF-ის (ყინულის ჰოკეის საერთაშორისო ფედერაცია) 20-წლამდელთა მსოფლიო ჩემპიონატის IV დივიზიონის მასპინძლობაზე განაცხადი წარადგინა. კენჭისყრის შედეგად კონგრესმა საქართველოს კანდიდატურა დაამტკიცა.

ჩემპიონატი 2027 წლის 10-16 იანვარს თბილისის ყინულის არენაზე გაიმართება. ეს ქართული 20-წლამდელთა ნაკრებისთვის სადებიუტო საერთაშორისო ასპარეზობა იქნება. ტურნირში საქართველოს, თურქმენეთის (უზბეკეთის ნაცვლად), ირანისა და ინდოეთის ნაკრები გუნდები მიიღებენ მონაწილეობას.

ქართულ ნაკრებს ამ წელს სხვა საერთაშორისო გამოწვევაც ელის: 2026 წლის აპრილში IIA დივიზიონის მატჩები ალ-აინში (არაბთა გაერთიანებული საამიროები) იყო დაგეგმილი, მაგრამ ახლო აღმოსავლეთის კონფლიქტის გამო გაუქმდა. IIHF-ის გადაწყვეტილებით, ეს მატჩები ახლა 2027 წლის 19-25 აპრილს ჩატარდება — ისევ ალ-აინში. ამ ეტაპზე საქართველო, არაბთა გაერთიანებული საამიროები, სერბეთი, ხორვატია, ბელგია და ავსტრალია ზედა ეშელონში ასვლისთვის იბრძოლებენ.