საქართველოში საქალაქთაშორისო ტრანსპორტი გაძვირდა — თბილისიდან ზუგდიდის, ჭიათურის, ბაკურიანის, ბორჯომის, ახალციხის, გორისა და მარნეულის მიმართულებებზე. გაძვირების მთავარ მიზეზად საწვავის ფასის ზრდა სახელდება — ახლო აღმოსავლეთის კონფლიქტის ფონზე ნავთობი საერთაშორისო ბაზარზე გაძვირდა, რასაც მიწოდების შეფერხებაც დაემატა.

ნავთობიმპორტიორთა კავშირის თავმჯდომარე ვახტანგ იობაშვილი პარლამენტის სხდომაზე ამ „ფორმულას” ასე ხსნის: „გაძვირდება ნავთობპროდუქტები საყიდლად? გაძვირდება გასაყიდად.”

მარნეული — „1 ლარიც ჩვენთვის ბევრია”

19 წლის თამაშა ვალიევა ილიას სახელმწიფო უნივერსიტეტის სტუდენტია. ყოველ კვირაში ხუთ-ექვსჯერ მარნეულიდან თბილისში გადის. მაისის დასაწყისიდან ერთი გზა ერთი ლარით გაძვირდა — 3-დან 4 ლარამდე. „სტუდენტები ვართ, 1 ლარიც ჩვენთვის ბევრია”, — ამბობს ის. სამუშაოს მოძებნა გაუჭირდება, ამიტომ ოჯახს ეყრდნობა და ცდილობს, დაზოგოს: „ცოტა ლექცია რომ გვაქვს, არ ვჭამ საჭმელს.”

თამაშა სახელმწიფოს სთხოვს, ქალაქგარეთ მოსული სტუდენტებისთვის შეღავათი გააკეთოს: „თბილისში მგზავრობა 20 თეთრია, სახელმწიფომ კარგი რაღაც გააკეთა, ჩვენთვისაც უნდა იყოს [შეღავათი].”

გორი — „რომელი ხელფასი გასწვდება ამხელა ხარჯს?”

გორის ფეისბუკ ჯგუფებში, სადაც 84 000-მდე ადამიანია, ადამიანები ყვებიან, როგორ გაუჭირდათ გაძვირებამ. სამარშრუტო ტაქსი გორი-თბილისი 7 ლარი ღირს, მინივენი — 10 ლარი, „ხელფასი კი იგივეა.” ბევრი გორელი იძულებულია თბილისში იმუშაოს, რადგან ადგილობრივი სამუშაო ადგილები არ არის.

მძღოლებს, რომლებიც ტრანსპორტს ახლა უფრო ძვირ საწვავზე ამუშავებენ, ფასი ასევე გაეზარდათ — წინააღმდეგ შემთხვევაში მუშაობის გაგრძელება ვეღარ შეძლებენ.