ჰომოფობიასთან, ბიფობიასა და ტრანსფობიასთან ბრძოლის საერთაშორისო დღეს Tbilisi Pride-მა სოციალურ ქსელში განცხადება გაავრცელა.

„ბოლო წლებში ქართულმა ოცნებამ სცადა, ქვიარ ადამიანები საჯარო სივრცეებიდან და საზოგადოებრივი ცხოვრებიდან გამეხსნა. გაძლიერდა სიძულვილი, ცენზურა და დევნა. თუმცა, ყველაფრის მიუხედავად, უარს ვამბობთ სასოწარკვეთაზე,” — ნათქვამია განცხადებაში.

ორგანიზაცია ხაზს უსვამს ქვიარ ადამიანების მედეგობას: „შეხვედრებზე, კლუბურ სივრცეებში, პროტესტის წინა ხაზებზე თუ ემიგრაციაში — ყველგან ვცდილობთ, ერთმანეთი არ დავკარგოთ.”

Tbilisi Pride 2013 წლის 17 მაისის ტრაგედიასაც გაიხსენებს. მაშინ, პუშკინის სკვერში შეკრებილ ლგბტ+ თემის წევრებს სასულიერო პირების თანხლებით ათასობით ადამიანი დაუპირისპირდა. შეხლა-შემოხლაში რამდენიმე მონაწილე დაშავდა. ადამიანის უფლებათა ევროპულმა სასამართლომ შემდგომ ეს ძალადობა „უპრეცედენტოდ” შეაფასა და საქართველოს 193 500 ევროს გადახდა დააკისრა, ვინაიდან ძალადობა „ხელისუფლების მდუმარე თანხმობით” მოხდა.

„ქვიარ ადამიანებს ისტორიულად გვიწევდა მტრულ გარემოში არსებობა. ამიტომ ვიცით, როგორ გადავრჩეთ, როგორ დავეხმაროთ ერთმანეთს და როგორ შევინარჩუნოთ ადამიანურობა ყველაზე რთულ პირობებშიც,” — ნათქვამია განცხადებაში.

17 მაისს მსოფლიოს 130-ზე მეტ ქვეყანაში ჰომოფობიასთან, ტრანსფობიასა და ბიფობიასთან ბრძოლის საერთაშორისო დღე აღინიშნება.