29 წლის მსჯავრდებული ნოდარ ტატუნაშვილი კომაშია — ამის შესახებ ოჯახის წევრები „ტვ პირველს” განუცხადეს. კლინიკაში შეყვანიდან ერთი კვირის შემდეგ პაციენტი მძიმე მდგომარეობაში ჩავარდა.

ტატუნაშვილი 60 დღეზე მეტია შიმშილობს. მისი მთავარი მოთხოვნაა ბათუმის ციხის მკაცრი რეჟიმის დაწესებულებიდან თბილისის ნებისმიერ პენიტენციურ განყოფილებაში გადაყვანა. 14 მაისს, ჯანმრთელობის გართულებების გამო, ის №3 პენიტენციური დაწესებულებიდან კლინიკა „ვივამედში” გადაიყვანეს.

„ვითხოვთ, გაგვარკვიონ — ცოცხალია თუ არა. ექიმი გამოვიდა და მითხრა: გაბუტულია, არ მელაპარაკება, ახლა ასეთი პროტესტის ფორმა აქვსო. რას ნიშნავს ეს? ღვიძლმა დაიწყო ზიანის მიყენება ორგანიზმს, ტვინში მძიმე მდგომარეობაა. ძალიან მძიმედ არის,” — ამბობს ტატუნაშვილის და.

ოჯახი ასევე ჩივის, რომ კლინიკა მათ ჯანმრთელობის მდგომარეობის შესახებ ინფორმაციას არ გადასცემს და, მათი თქმით, პაციენტს არასწორ მკურნალობას უტარებდნენ — დეტალური გამოკვლევები ჩატარებული არ ყოფილა, 5%-იანი გლუკოზა შეჰყავდათ.

სპეციალურმა პენიტენციურმა სამსახურმა 1 ივნისს განცხადება გაავრცელა. უწყების ცნობით, ტატუნაშვილი კლინიკაშიც მკურნალობაზე უარს ამბობდა. სამსახური განმარტავს, რომ 2026 წლის 1 აპრილიდან ის შიმშილობდა, უარს ამბობდა ლაბორატორიულ გამოკვლევებსა და ვიტალური პარამეტრების კონტროლზე. პაციენტს არაერთხელ შესთავაზეს სამოქალაქო კლინიკაში გადაყვანა, თავდაპირველად ის უარობდა, 13 მაისს კი დათანხმდა.

14 მაისს ტატუნაშვილი „ვივამედში” გადაიყვანეს. სამსახურის ინფორმაციით, შესვლისას ის დამოუკიდებლად გადაადგილდებოდა და კონტაქტური იყო, თუმცა შიმშილობის გამო ფიზიკურად დასუსტებული. კლინიკაშიც, მიუხედავად არაერთგზის შეთავაზებისა, საკვების მიღებაზე უარს ამბობდა.