ქართველი მსახიობი თათია წულაძე ლეა მისიუსის ახალ ფილმ „დაბადების დღის წვეულებაში” (The Birthday Party / Histoires de la nuit) მონაწილეობს, რომელიც კანის 2026 წლის 79-ე საერთაშორისო კინოფესტივალის „ოქროს პალმის რტოს” საკონკურსო პროგრამაში შევიდა. ფილმში ასევე თამაშობენ მონიკა ბელუჩი, ბენუა მაჟიმელი, ჰაფსია ჰერზი, ბასთიენ ბუილიონი, პოლ ჰამი და ალენ დელაჰე.

საფრანგეთიდან „ამბებს” გასაუბრებული წულაძე ამბობს, რომ წარმატება „დიდ შრომასა და იღბალს” ემყარება: „ძალიან დიდ შრომას, თუმცა იღბალსაც — ბედი იყო, ამ ფილმის კასტინგის შესახებ რომ გავიგე და მე შემარჩიეს. მოვხვდი იმ რეჟისორის ფილმში, რომლის ფილმებიც ყოველთვის მომწონდა.”

ფილმში წულაძე ასრულებს გოგონა კიმის — მთავარი გმირის, ნორას მეგობრის — როლს. კიმის სცენა ნორას დაბადების დღეზეა, ღონისძიება კი კოშმარად გარდაიქმნება, როცა ნორას წარსულის ადამიანები კვლავ მის ცხოვრებაში ჩნდებიან.

გადასაღები მოედანი ფრანგულ სოფელში მდებარეობდა. „ძალიან ლამაზ, განსხვავებულ გარემოში მიმდინარეობდა გადაღებები. გადამღებ ჯგუფთან ერთად მდინარესთან გავდიოდი და თავი ჯადოსნურ, ზღაპრულ სამყაროში მეგონა,” — ჰყვება მსახიობი.