პატრიოტთა ალიანსის ლიდერი დავით თარხან-მოურავი ამბობს, რომ ამერიკა თანმიმდევრულად ამარცხებს რუსეთს გლობალური გეოპოლიტიკის ყველა მნიშვნელოვან ფრონტზე — ვენესუელაში, ლიბიაში, სირიაში, ირანში, სომხეთსა და საქართველოშიც.

„სომეხი ბიზნესმენების 90% რუსეთს უკავშირდება, მაგრამ ამ პირობებშიც პრორუსული განწყობები მარცხდება და პროამერიკული ფაშინიანი იმარჯვებს. რაზე მეტყველებს ეს? იმაზე, რომ ამერიკა ართმევს რუსეთს სომხეთს,” — ამბობს თარხან-მოურავი.

ამიტომ, მისი თქმით, ქართველებმა უნდა გაიაზრონ გეოპოლიტიკური რეალობა: „საქართველოც ამერიკული ქვეყანაა. ამერიკა ყველაზე ძლიერი სახელმწიფოა მსოფლიოში — მსოფლიოს ეკონომიკის ერთი მესამედი. ამერიკასთან ლანძღვა-გინება და ჭიდაობა კატასტროფამდე მიგვიყვანს.”

თარხან-მოურავი მოუწოდებს ქართველ პოლიტიკოსებს, „გონივრულობა” გამოიჩინონ და ქვეყნის ურთიერთობები — ამერიკასთანაც, რუსეთთანაც, ევროპასთანაც — ამ ანალიზის გათვალისწინებით ააგონ.