სახელმწიფო უსაფრთხოების სამსახურმა (სუსი) 30 მაისს ორი ქართველი მოქალაქე ჯაშუშობის ბრალდებით დააკავა. ეს ერთ დღეში ორი ასეთი ფაქტი გახდა.

გულბაათ რცხილაძე

პირველი დაკავებული გულბაათ რცხილაძეა — კრემლთან დაკავშირებული „ევრაზიის ინსტიტუტის” დამფუძნებელი და ხელმძღვანელი. სუს-ის ბრიფინგზე სამსახურის უფროსის მოადგილე ლაშა მაღრაძემ განაცხადა, რომ რცხილაძე „წლების განმავლობაში, მატერიალური სარგებლის მიღებით, სისტემატურად ახორციელებდა ორი ქვეყნის სპეცსამსახურებისთვის სადაზვერვო ინფორმაციის მოწოდებას.”

მაღრაძის ცნობით, ინფორმაცია გადაეცემოდა როგორც პირდაპირი შეხვედრებით, ისე ელექტრონული საშუალებებით, ხოლო შეხვედრები ხშირად „ქვეყნის საზღვრებს გარეთ” იმართებოდა. „ევრაზიის ინსტიტუტს” 2020 წლიდან კრემლის მხარდაჭერილი ფონდი „პრავფონდი” აფინანსებს — ამას „აი ფაქტის” 2025 წლის გამოძიება ადასტურებს.

ირაკლი ჩიხლაძე

იმავე დღეს, გვიან, სუს-მა მეორე დაკავებაც გამოაცხადა — ჟურნალისტი და „სამოქალაქო მოსმენების კავკასიური ცენტრის” ხელმძღვანელი ირაკლი ჩიხლაძე. მაღრაძის თქმით, ჩიხლაძე „ონლაინ პლატფორმის საფარით” სადაზვერვო ქსელს მართავდა, კოორდინაციას უწევდა მათ საქმიანობას და „მიღებულ ინფორმაციაზე, დავალებებსა და ანაზღაურებაზე” პასუხისმგებელი იყო.

სუს-ი აცხადებს, რომ ჩიხლაძეს ერთი ქვეყნის სპეცსამსახურებთან „კონსპირაციული კონტაქტები” ჰქონდა. მის შემთხვევაში ქვეყნის სახელი საჯაროდ არ გახმოვანებულა. ჩიხლაძის ძმა, ჟურნალისტი გიგა ჩიხლაძე, 2008 წლის ომში დაიღუპა.

ორივე საქმეში გამოძიება მიმდინარეობს სისხლის სამართლის კოდექსის 314-ე მუხლის პირველი ნაწილით — ჯაშუშობა, სანქცია: 8-12 წლის თავისუფლების აღკვეთა.