საქართველოს სახელმწიფო უსაფრთხოების სამსახურმა (სუსი) 19 მაისს ბრიფინგზე განაცხადა, რომ პანკისის ხეობაში ჩატარებული „მასშტაბური ღონისძიების” შედეგად სამი ქართველი მოქალაქე დააკავა. ოპერაცია სოფლებში — ომალოში, ბირკიანსა და ჯოყოლოში — გაიმართა.

სუს-ის უფროსის მოადგილე ლაშა მაღრაძე ბრიფინგზე ამბობდა, რომ ეჭვმიტანილებს ბრალად ედებათ „ისლამური სახელმწიფოს” ტერორისტულ ორგანიზაციაში გაერთიანება და უცხო ქვეყნიდან ტერორისტული დავალებების მიღება. სუს-ის ინფორმაციით, ისინი ცდილობდნენ ხეობაში ტერორისტული ორგანიზაციის მხარდამჭერი „ჯამაათი” ჩამოეყალიბებინათ, ფარულ შეხვედრებს მართავდნენ და ტერორისტული იდეოლოგიის პროპაგანდას ეწეოდნენ.

საგამოძიებო მოქმედებების შედეგად ამოღებულ ნივთებში სუს ასახელებს: ცეცხლსასროლ იარაღს, ასაფეთქებელ ნივთიერებასა და საბრძოლო მასალას, კომპიუტერულ ტექნიკასა და ელექტრონულ მოწყობილობებს, აგრეთვე „ისლამური სახელმწიფოს” დროშასა და სიმბოლიკის ამსახველ ნივთებს.

გამოძიება მიმდინარეობს საქართველოს სისხლის სამართლის კოდექსის 328-ე და 236-ე მუხლებით, რაც 10-დან 17 წლამდე თავისუფლების აღკვეთას ითვალისწინებს.

პანკისის ხეობა კახეთის მხარეში, ახმეტის მუნიციპალიტეტში მდებარეობს. ის ქართველ ქისტთა — ჩეჩნებთან ახლომდგომი, ნახური ტომის — ძირითადი საცხოვრებელი ადგილია. 2001–2002 წლებში ხეობა „ალ-ქაედასთან” დაკავშირებული ელემენტების სამყოფელი გახდა, თუმცა ქართულ-ამერიკული სამხედრო ოპერაციების შედეგად ხეობა გაასუფთავეს. მომდევნო წლებშიც პერიოდულად ხდებოდა „ისლამური სახელმწიფოს” კავშირის ბრალდებით ადგილობრივთა დაკავება.