სახელმწიფო უსაფრთხოების სამსახურმა ჯაშუშობის ბრალდებით საქართველოს ერთი მოქალაქე დააკავა — ერთ-ერთი არასამთავრობო ორგანიზაციის დამფუძნებელი და ხელმძღვანელი, რომელიც, სუს-ის მიხედვით, ორი სახელმწიფოს სპეცსამსახურებთან იყო კავშირში.

30 მაისს გამართულ ბრიფინგზე სუს-ის უფროსის მოადგილემ, ლაშა მაღრაძემ, განაცხადა, რომ გამოძიებამ დაადგინა: ბრალდებული წლების განმავლობაში, მატერიალური სარგებლის მიღებისა და უცხო ქვეყნის ინტერესების გატარების მიზნით, სისტემატურად გადასცემდა სადაზვერვო ხასიათის ინფორმაციას.

„დაკავებულს უცხო ქვეყნების სპეცსამსახურების წარმომადგენლებთან მაღალ დონეზე ორგანიზებული, კონსპირაციული ხასიათის სისტემატური კონტაქტები ჰქონდა. ინფორმაციის მიწოდება ხდებოდა როგორც პირისპირ შეხვედრების, ასევე ელექტრონული საშუალებების გამოყენებით. კონსპირაციის დაცვის მიზნით შეხვედრები ქვეყნის საზღვრებს გარეთაც ტარდებოდა,” — განაცხადა მაღრაძემ.

სუს-ის ცნობით, ბრალდებულს, უცხო სპეცსამსახურების დავალებით და დაფინანსებით, შექმნილი ჰქონდა საინფორმაციო პლატფორმები და ორგანიზებას უწევდა სხვადასხვა ღონისძიების ჩატარებას ქვეყნის მასშტაბით. იგი ერთდროულად ორი სახელმწიფოს სპეცსამსახურებს ემსახურებოდა.

მაღრაძემ არ დაასახელა, კონკრეტულად რომელ ქვეყნებზეა საუბარი. დაკავებულის ვინაობა ჯერჯერობით უცნობია.

გამოძიება მიმდინარეობს საქართველოს სისხლის სამართლის კოდექსის 314-ე მუხლის პირველი ნაწილით, რაც სასჯელის სახით 8-დან 12 წლამდე თავისუფლების აღკვეთას ითვალისწინებს.

ეს ამ თვეში ჯაშუშობის ბრალდებით დაკავების მეორე შემთხვევაა. მაისის დასაწყისში პროკურატურამ ბრალი ასევე ჯაშუშობის მუხლით წარუდგინა გიორგი უძილაურს — ფინანსური პოლიციის ყოფილ მოხელეს.