სომხეთში 7 ივნისს დილის 8 საათზე გაიხსნა საარჩევნო უბნები — ქვეყანა მე-9 მოწვევის ეროვნულ ასამბლეას ირჩევს. ხმის მიცემა 20:00 საათამდე გაგრძელდება, ხოლო ძირითადი ქალაქების, მათ შორის დედაქალაქ ერევნის, შედეგები სავარაუდოდ ამ ღამის 2–3 საათზე გახდება ცნობილი.

სომხეთის პრემიერ-მინისტრის მოვალეობის შემსრულებელმა ნიკოლ ფაშინიანმა ხმა მისცა და ჟურნალისტებს განუცხადა: „ველოდები სომხეთის მოქალაქეების თავისუფალი ნების გამოხატვას.” მისი თქმით, ამომრჩეველმა გადაწყვეტილება სახელმწიფოს ინტერესების, დამოუკიდებლობისა და მშვიდობის დაცვის კუთხით უნდა მიიღოს. კითხვაზე, გამარჯვების შემთხვევაში პირველ ვიზიტს სად განახორციელებდა, ფაშინიანმა განაცხადა: „წავალ მოსკოვში, ვაშინგტონში, ბრიუსელში, პარიზსა და თბილისში.”

საქართველოსთან ურთიერთობის შესახებ მან თქვა, რომ ორ ქვეყანას შორის ისეთი კარგი ურთიერთობა არსებობს, „რომ შეუძლებელია კიდევ უფრო გაღრმავებაზე საუბარი.” ფაშინიანის თქმით, რეგიონში მიმდინარე საერთაშორისო პროექტები სარგებელს მოუტანს სომხეთს, საქართველოს, აზერბაიჯანს, თურქეთსა და ირანს.

სომეხთა კათოლიკოს-პატრიარქი გარეგინ II-მ ასევე ხმა მისცა და საარჩევნო უბნიდან გამოსულმა განაცხადა: „ჩვენი არჩევანი ლოცვითა და ვედრებით გავაკეთეთ, რათა ღმერთმა სომხური სახელმწიფო ურყევად შეინარჩუნოს. დაგვეხმაროს ძლიერი, უსაფრთხო, დაცული, კანონმორჩილი და აყვავებული ქვეყნის აშენებაში.” გარეგინ II ფაშინიანის მთავრობას 2020 წლიდან ღიად უპირისპირდება და ითხოვს პრემიერ-მინისტრის გადადგომას. ფაშინიანი, თავის მხრივ, მას პოლიტიკაში ჩარევაში ადანაშაულებს.

სომხეთის 9-ე ეროვნულ ასამბლეაში ადგილებისთვის 16 პარტია და 2 ბლოკი იბრძვის. საარჩევნო ბარიერი პარტიებისთვის 4%-ია, ბლოკებისთვის კი 8% ან მეტი. ახლად არჩეულ პარლამენტში სულ მცირე 101 დეპუტატი იქნება.

მთავარი კონკურენტები:

• „სამოქალაქო შეთანხმება” — ფაშინიანის მმართველი პარტია; პლატფორმა ევროკავშირთან დაახლოებასა და დასავლურ ორიენტაციას ეფუძნება.
• „სომხეთის ალიანსი” — ყოფილი პრეზიდენტი რობერტ ქოჩარიანი; მთავარი საპარლამენტო ოპოზიცია.
• „ძლიერი სომხეთი” — ახალი პრო-რუსული ბლოკი; ზურგს უკან მოსკოვში მოღვაწე მილიარდერი სამველ კარაპეტიანი დგას.
• „აყვავებული სომხეთი” — ბიზნესმენი გაგიკ წარუკიანი; მკვეთრად ოპოზიციური, პრო-რუსული ფლანგი.
• „ერთობის ფრთები” — ყოფილი ომბუდსმენი არმან თათოიანი.
• „სომხეთის ეროვნული კონგრესი” — პირველი პრეზიდენტი ლევონ ტერ-პეტროსიანი.

სერჟ სარქისიანის „რესპუბლიკური პარტია” ამ არჩევნებს ბოიკოტს უცხადებს.