სოკარმა ყველა საჭირო მარეგულირებელი თანხმობის მიღების შემდეგ API Holding-ისგან Italiana Petroli (IP) აქციების 99.82% შეიძინა. გარიგება, რომელიც სოკარის გრძელვადიანი სტრატეგიის ნაწილია, ევროპულ ბაზარზე კომპანიის წინსვლის მომდევნო ეტაპს წარმოადგენს.

Italiana Petroli 90 წელზე მეტია იტალიის ბაზარზე — კომპანიას ორი ნავთობგადამამუშავებელი ქარხანა, ნავთობბაზები და დაახლოებით 4 600 ავტოგასამართი სადგური აქვს. ეს სოკარის ევროპულ პორტფელს, რომელიც უკვე შვეიცარიას, ავსტრიასა და რუმინეთს მოიცავდა, მნიშვნელოვნად აძლიერებს.

სტრატეგიული მნიშვნელობა

იტალია სოკარისთვის განსაკუთრებული ბაზარია: კომპანია ბაქო-თბილისი-ჯეიჰანის მილსადენით ქვეყანას ნედლი ნავთობით ამარაგებს, ხოლო სამხრეთის გაზის დერეფნის მეშვეობით — ბუნებრივი გაზის მიწოდებით ხელს უწყობს ევროპის ენერგოდამოუკიდებლობას. IP-ის შეძენა ამ ურთიერთობას კიდევ უფრო ამყარებს.

სოკარის პრეზიდენტმა როვშან ნაჯაფმა გარიგების ფარგლებში იტალიაში ვიზიტის დროს შეხვედრები გამართა გარემოს დაცვისა და ენერგეტიკული უსაფრთხოების მინისტრ ჯილბერტო პიკეტო ფრატინთან და საწარმოებისა და „Made in Italy”-ის მინისტრ ადოლფო ურსოსთან.

სოკარის საერთაშორისო გაფართოება 20 წლის წინ სწორედ საქართველოდან დაიწყო — ეს პირველი ბაზარი იყო, სადაც კომპანიამ სახელმწიფო საზღვრებს გარეთ ოპერირება დაიწყო.