26 ივნისს საქართველოში ყველაზე მასშტაბური სპორტული ზეიმი — სასკოლო სპორტული ოლიმპიადა 2026-ის დასკვნითი თამაშები — ოფიციალურად დასრულდა.

ოლიმპიადის ხანგრძლივი სეზონი ჯერ კიდევ გასული წლის სექტემბერში, მუნიციპალური თამაშებით დაიწყო. ამას მოჰყვა რეგიონული და ბოლოს — აღმოსავლეთისა და დასავლეთ საქართველოს თამაშები.

მთელი ამ მარათონის კულმინაცია კი დასკვნითი ეტაპი გახდა, რომელიც 19 ივნისს საზეიმოდ გაიხსნა.

დასკვნით თამაშებზე სხვადასხვა რეგიონიდან ჩამოსული მოსწავლე სპორტსმენები ერთმანეთს სპორტის რვა სახეობაში დაუპირისპირდნენ: მინი ფეხბურთში, მაგიდის ჩოგბურთში, მძლეოსნობაში, ხელბურთში, კალათბურთსა და 3X3 კალათბურთში, ფრენბურთსა და ბადმინტონში.

ყველა სახეობაში, როგორც გოგონათა, ისე ვაჟთა კატეგორიებში, სასკოლო სპორტული ოლიმპიადის ახალი ჩემპიონები გამოვლინდნენ. ფინალურმა შეხვედრებმა უკიდურესად დაძაბულ, ემოციურ და საინტერესო ვითარებში ჩაიარა, სადაც მოსწავლეებმა მაქსიმალური მონდომება და სპორტული ჟინი გამოავლინეს.

ეროვნულ დონეზე მოპოვებული ეს ბრწყინვალე გამარჯვება მხოლოდ ოლიმპიადის ოქროს მედლებს არ ნიშნავს. დასკვნით თამაშებზე გამარჯვებული მოსწავლეები ახლა უკვე ერთი ნაბიჯით ახლოს არიან უმთავრეს ოცნებასთან — მათ მიეცემათ შანსი, საკუთარ სპორტის სახეობებში სასკოლო მსოფლიო ჩემპიონატზე იასპარეზონ და საქართველოს სახელი საერთაშორისო ასპარეზზე გაიტანონ.

ეს ყოველწლიური მასშტაბური პროექტი საქართველოს ბავშვთა და სასკოლო სპორტის ეროვნული ფედერაციის ორგანიზებით ხორციელდება და მასში წელსაც, ტრადიციულად, 100 000-ზე მეტი ბავშვი და 1800-ზე მეტი სკოლა იყო ჩართული.

მართალია, სასკოლო სპორტული ოლიმპიადის 2026 წლის სეზონი დასრულდა, თუმცა სპორტული შესვენება დიდხანს არ გასტანს. ახალი, 2027 წლის სეზონის სასტარტო მუნიციპალური თამაშები მიმდინარე წლის სექტემბერში დაიწყება და ახალგაზრდა სპორტსმენებს რევანშისა და ახალი მწვერვალების დაპყრობის შესაძლებლობას მისცემს.

სასკოლო სპორტული ოლიმპიადის პროგრამა კი საქართველოს სპორტის სამინისტროს, საქართველოს განათლების, მეცნიერებისა და ახალგაზრდობის სამინისტროს და საქართველოს ეროვნული ოლიმპიური კომიტეტის მხარდაჭერით ხორციელდება.

სასკოლო სპორტული ოლიმპიადის დასკვნითი თამაშები კი აჭარის ავტონომიური რესპუბლიკის განათლებისა და სპორტის სამინისტროს, აჭარის ავტონომიური რესპუბლიკის სპორტის დეპარტამენტისა და დეველოპერული კომპანია “მეტროპოლის” მხარდაჭერით განხორციელდა.