მაისის ბოლო და ივნისის დასაწყისი საქართველოში ტრადიციულად სკოლის დამთავრებასთან ასოცირდება — თეთრი პერანგები, ემოციური წარწერები, ცრემლიანი სახეები. მაგრამ ეს ყოველივე სულ უფრო ძვირი ჯდება: ოჯახები ეჯიბრებიან ერთმანეთს ფუფუნებით, ხოლო ზოგი ამ ხარჯებს საბანკო სესხით ფარავს.

„ბიუჯეტური” ვარიანტი: 1 500–3 000 ლარი

რეგიონებსა და შედარებით მოკრძალებულ სკოლებში ხარჯები 2 000 ლარამდე მერყეობს, მაგრამ ესეც სერიოზული დარტყმაა ოჯახის ბიუჯეტისთვის. ერთ-ერთი მშობელი ამბობს: „ბოლო ზარით და ბანკეტით 3 000 ლარი დამიჯდა. მიუხედავად ამისა, ჩემი შვილი ისე შეეცოდა, მითხრა — დედა, არ გინდა, რაც მაქვს, იმას ჩავიცვამ. ეგ მშობელთა შეჯიბრებაა, ვისი შვილი უფრო მდიდრად წარმოაჩენს ოჯახს.”

„საშუალო თბილისური” დღესასწაული: 4 000–6 000 ლარი

ამ კატეგორიაში შედის დიზაინერული კაბა, ქალაქგარეთ სასტუმროს დაჯავშნა და ორდღიანი „ტურნე”. ერთ-ერთი გოგონას დედა: „6 ათასი ლარი დამიჯდა. ამაში შედის კაბა და ორი დღე სასტუმრო ქალაქგარეთ. ზოგიერთ მშობელს ხარჯის შესამცირებლად სასტუმრო გამოუტოვებია, ზოგი კი ბანკეტზეც ვერ მოდის.”

„პრემიუმი”: 8 000–10 000 ლარი

სოციალურ ქსელებში მსჯელობები 10 000 ლარამდე ბანკეტებზეც საუბრობს. ერთ-ერთი მშობელი: „ჩემმა ახლობელმა მითხრა — 10 000 ლარი დამიჯდაო. კარგით, რა ხალხო! ღმერთო, როდის შეიგნებენ მშობლები, რომ ეს თანხა შვილებს მოახმარონ, წლობით საბანკო ვალს იხდიან?”

სპეციალისტები მოუწოდებენ მშობლებს, გამოსამშვიდობებელ ღონისძიებებს ახლებური — ემოციებზე, არა ხარჯებზე — ორიენტირებული მიდგომით მიუდგნენ.