განათლებისა და მეცნიერების მინისტრის გივი მიქანაძის ბრძანებით სკოლებში ელექტრონული საკომუნიკაციო საშუალებების გამოყენების წესი ოფიციალურად დარეგულირდა. 4 თებერვლის კანონის საფუძველზე სკოლებში ტელეფონების გამოყენება კრძალვა ძალაშია; ახალი ბრძანება ამ კრძალვის პრაქტიკულ განხორციელებას ადგენს.

სკოლებს 2026 წლის 1 სექტემბრამდე ევალებათ მობილური ტელეფონებისა და „ჭკვიანი” საათების შესანახი სპეციალური სათავსების შეძენა და მონტაჟი. სათავსების განლაგების პრინციპს — კლასებში ცალ-ცალკე თუ სხვაგვარად — სკოლა სპეციფიკის გათვალისწინებით თავად განსაზღვრავს.

ბრძანების თანახმად, ტელეფონის გამოყენება სკოლაში დაიშვება:

— სასწავლო-საგანმანათლებლო მიზნებისთვის, უფლებამოსილი პირის წინასწარი თანხმობით; — ჯანმრთელობის მონიტორინგისა და სამედიცინო მიზნებისთვის, მშობლის მიერ წარდგენილი დოკუმენტაციის საფუძველზე; — საგანგებო სიტუაციებსა და გადაუდებელ შემთხვევებში; — სპეციალური საგანმანათლებლო საჭიროების ან შეზღუდული შესაძლებლობის მქონე მოსწავლეებისთვის, სპეციალისტისა და მშობლის ერთობლივი გადაწყვეტილებით; — ინდივიდუალური სასწავლო საჭიროებისთვის, სპეციალისტის ცნობის საფუძველზე; — სკოლის შინაგანაწესით განსაზღვრულ სხვა შემთხვევებში.

სკოლა ვალდებულია მშობლებს წინასწარ გააცნოს ოფიციალური საკომუნიკაციო არხები — სკოლის საკონტაქტო ტელეფონი, კლასის დამრიგებლის ელ-ფოსტა ან სასკოლო საინფორმაციო სისტემა. მოსწავლის მშობელთან კომუნიკაცია სწორედ ამ არხებით განხორციელდება.

„ქართული ოცნების” პარლამენტმა ზოგადი განათლების შესახებ კანონში შესაბამისი ცვლილებები 2026 წლის 4 თებერვალს III მოსმენით მიიღო.