„სიმღერის აკადემია” პირდაპირ ეთერში მომხდარ ინციდენტს სოციალური ქსელის საშუალებით ეხმაურება და ამბობს, რომ სცენის განათებისა და ხმამაღალი მუსიკის გამო ხელმძღვანელებმა ბავშვის წაქცევის მომენტი ვერ დაინახეს.

„პირდაპირი ეთერის დროს ხელმძღვანელებმა გაიგეს მხოლოდ დაცემის ხმა. მიმართულებისკენ გახედვისთანავე დაინახეს მომღერლებს შორის წამომჯდარი ბავშვი”, — ნათქვამია განცხადებაში.

„სიმღერის აკადემია” ამბობს, რომ სოციალურ ქსელში გავრცელებული ვიდეო სატელევიზიო ეთერიდან კი არ არის, არამედ დარბაზში მყოფი ერთ-ერთი მშობლის ტელეფონიდან. სწორედ გუნდის ხელმძღვანელებმა გაუგზავნეს ეს ჩანაწერი ბავშვის მშობლებს, რათა სამედიცინო ყურადღება სრულყოფილი ყოფილიყო.

„საბედნიეროდ, ბავშვმა გონების ხანმოკლე დაკარგვის შემდეგ თავი კარგად იგრძნო, სრულფასოვნად გააგრძელა მონაწილეობა და სამახსოვრო ფოტოებიც გადაიღო”, — ნათქვამია განცხადებაში.

ბავშვის ბებია, ანა კუხალეიშვილი, სოციალურ ქსელში სხვაგვარ სურათს ხატავს: „სამი წუთის განმავლობაში ბავშვი უყურადღებოდ იწვა იატაკზე. ამ სამი წუთის განმავლობაში არავინ იცოდა, ჰქონდა თუ არა თავის ტრავმა, სჭირდებოდა თუ არა სასწრაფო დახმარება.” მისივე თქმით, „ყველაზე მთავარი გამორჩათ — ადამიანი, ბავშვი.”